पुण्यात चोरांनी दुकानातून चक्क कोंबड्या केल्या गायब

तिघे जण गाडीवरून येऊन कुलूप तोडून पोत्यामध्ये कोंबड्या भरून हडपसरच्या दिशेने गेल्याचे सीसीटीव्हीत कैद झालं आहे. त्यानंतर हडपसर पोलीस ठाण्यात 500 रुपयाच्या 20 कोंबड्या चोरीला गेल्याची तक्रार दिली आहे.

chicken

पुणे : आषाढ महिन्याच्या शेवटच्या रविवारी मोठ्या प्रमाणात मासांहर केला जातो. मात्र आखाडी साजरी करण्यासाठी पुण्यात कमालच झालीय. हडपसर येथे चक्क कोंबड्यांचीच चोरी करण्यात आली आहे. हडपसर हिंगणेमळा येथे हाजी चिकन शॉप शेजारील एका पिंजऱ्याचे कुलूप तोडून तब्बल 20 गावरान कोंबड्या चोरीला गेल्याचा प्रकार समोर आला आहे. 

आखाडीसाठी चक्क कोंबड्या चोरल्याने हडपसर परिसरात एकच चर्चा रंगली आहे. रविवारी पहाटे सुमारे तीन वाजण्याच्या सुमारास हिंगणेमळा याठिकाणी ही घटना घडली. रविवार असल्याने गावरान कोंबड्या विक्रीसाठी दुकानदाराने पिंजऱ्यात आणून ठेवल्या होत्या. मात्र सकाळी दुकान उघडले आणि शेजारील पिंजऱ्यात पाहिले तर कुणीतरी पिंजऱ्याचे कुलूप तोडून आतमधून कोंबड्या चोरल्याचे समजले. रविवारी चिकनसाठी लोकांची गर्दी असते. मात्र कोंबड्याच चोरीला गेल्यानं मालकाला मोठं नुकसान सहन करावा लागलं आहे. 

कोंबड्याच चोरीला गेल्यानं मालकाला डोक्याला हात लावून बसायची वेळ आली होती. दुकानाशेजारील योगेश हिंगणे यांनी याबाबत दुकानाच्या समोर असलेल्या सीसीटीव्ही कॅमेरात पाहिले असता तीन अज्ञात इसम गाडीवरून येऊन कुलूप तोडून पोत्यामध्ये कोंबड्या भरून हडपसरच्या दिशेने गेल्याचे सीसीटीव्ही कॅमेरात कैद झालं आहे. त्यानंतर हडपसर पोलीस ठाण्यात 500 रुपयाच्या 20 कोंबड्या चोरीला गेल्याची तक्रार दिली आहे. माझी गरिबी परिस्थिती आहे, कोंबड्यांचा शोध घेऊन मला द्याव्यात, अशी विनंती मालकाने केलीय. याबाबत हडपसर तपास विभागाचे पोलीस चोरट्याचा शोध घेत आहेत. दरम्यान आखड साजऱ्या करणाऱ्या या चोरट्यांचा पोलीस शोध घेत असले तरी दुसरीकडे या कोंबड्या चोरीच्या घटनेची सर्वत्र चर्चा सुरु आहे.