जिगरबाज आबासाहेब सावंतांच्या पाठीवर गृहमत्र्यांची शाबासकीची थाप, कारवाईसाठी केलेला बोनेटवर जीवघेणा प्रवास

सावंतांनी लावलेली जीवाची बाजी आणि प्रत्यक्षदर्शींचे प्रसंगावधान यामुळे चालकाला बेड्या ठोकण्यात यश आले होते. याची दखल गृहमंत्री अनिल देशमुख यांनी घेतली.

पिंपरी-चिंचवड: गृहमंत्री अनिल देशमुखांनी पिंपरी चिंचवडचे वाहतूक पोलीस आबासाहेब सावंतांच्या कार्याचे कौतुक केले. कर्तव्यावर असताना एका चालकाने सावंतांना ठोकर दिली, तेव्हा ते बोनेटवर पडले. अशा परिस्थितीत त्या चालकाने एक किलोमीटर अंतर सुसाट गाडी पळवली होती. सावंतांनी लावलेली जीवाची बाजी आणि प्रत्यक्षदर्शींचे प्रसंगावधान यामुळे चालकाला बेड्या ठोकण्यात यश आले होते. याचा थरार कॅमेऱ्यातून सर्वांसमोर आला. त्यानंतर आज गृहमंत्री देशमुखांनी सावंतांना मुंबई बोलवून त्यांचं कौतुक केलं. यावेळी पिंपरी चिंचवड पोलीस आयुक्त कृष्ण प्रकाश ही उपस्थित होते.

जिगरबाज आबासाहेब सावंतांच्या पाठीवर गृहमत्र्यांची शाबासकीची थाप, पिंपरी चिंचवडमध्ये कारवाईदरम्यानं गाडीच्या बोनेटवरून सावंतांना फरफटत नेलं होतं@abpmajhatv pic.twitter.com/HOhVBpoyNK

— Vaibhav Suresh Parab (@vaibhavparab21) November 9, 2020

सायंकाळी चारच्या सुमारास अहिंसा चौकात वाहतूक पोलीस आबासाहेब सावंत आणि इतर कर्मचारी विनामास्क फिरणाऱ्यांवर कारवाई करत होते. तेव्हा चिंचवड स्टेशन चौकाकडून चाफेकर चौकाकडे 50 वर्षीय युवराज हणवते त्यांच्या चारचाकीतून निघाले होते. पण त्यांनी घातलेला मास्क हा नाक आणि तोंड सोडून गळ्याजवळ असल्याचं पोलिसांच्या निदर्शनास आलं. म्हणून कारवाईसाठी त्यांना हात दाखवला असता हणवते पोबारा करण्याच्या प्रयत्नात होते. मात्र, त्यांच्या पुढे वाहतूक पोलीस आबासाहेब सावंत आले आणि त्यांनी गाडी रोखली. हणवतेंनी थोडावेळ थांबलोय, असं दाखवण्याचा प्रयत्न केला आणि पुन्हा रेसवर पाय दिला असता सावंत यांच्या पायाला धक्का लागला.

तेव्हा सावंत यांचा बोनेटच्या दिशेने तोल गेला. ते बोनेट वरून खाली उतरणार तोवर हणवते यांनी गाडीचा वेग वाढवला. ही बाब काही उपस्थित दुचाकीस्वार आणि रिक्षाचालकांनी पाहिली. मग हणवतेच्या गाडीचा फिल्मी स्टाईल पाठलाग सुरू झाला. काही क्षणातच अहिंसा चौकातून हणवते चाफेकर चौकात पोहचले, मग हणवते यांनी गाडीचा वेग आणखीच वाढवला. गाडी चिंचवड पोलीस स्टेशनसमोर आली, तेव्हा दोन्ही बाजूंनी दोन दुचाकीस्वार, पुढे एक रिक्षा असं घेरण्यात आलं. पण चारचाकी सुसाट होती. सावंत जीव मुठीत घेऊन बोनेटला कसेबसे धरून बसले होते. काही केल्या हणवते थांबायचं नाव घेईना, शेवटी एक दुचाकीस्वाराने शक्कल लढवली आणि पुढे धावणारी मोठी चारचाकी गाडी रस्त्यात थांबवली. तेव्हा मात्र हणवतेसमोर पर्याय उरलाच नाही. गाडी थांबताच सावंतांसह सर्वांनी सुटकेचा निश्वास सोडला. मग हणवतेंकडे सर्वांनी मोर्चा वळवला, उपस्थितांनी गाडीला घेरलं आणि हणवतेना गाडीतून बाहेर येण्याची सूचना सुरू झाली.