Pune Bypoll election : ...म्हणून मी हिंदू महासंघाकडून कसब्यातून निवडणूक लढवणार- आनंद दवे
हिंदू महासंघाचे अध्यक्ष आनंद दवे यांनी अर्ज भरणार असल्याची घोषणा केली आहे. उद्या (7 फेब्रुवारी मंगळवार) उमेदवारी अर्ज दाखल करणार असल्याचे दवे यांनी सांगितले आहे.
Pune Bypoll election : पुण्यातील कसबा मतदारसंघातून (Kasba Bypoll Election) भाजपकडून टिळकांच्या घरातील व्यक्तीला उमेदवारी न दिल्याने राजकीय वातावरण चांगलंच तापलं आहे. त्यामुळे या निवडणुकीत आता हिंदू महासंघ मैदानात उतरणार आहे. हिंदू महासंघाचे अध्यक्ष आनंद दवे यांनी अर्ज भरण्याची घोषणा केली आहे. उद्या (7 फेब्रुवारी मंगळवार) उमेदवारी अर्ज दाखल करणार असल्याचे दवे यांनी सांगितले आहे. खुल्या प्रवर्गाचा आवाज विधानसभेत पोहोचवण्यासोबतच पुणेश्वराला मुक्त करणे तसेच स्वच्छ, सुंदर कसबा हे आपले ध्येय असल्याचे दवे यांनी सांगितलं आहे.
दवे म्हणाले की, भाजपला काही जातींची केवळ मते हवी असतात. त्या जाती नकोच असतात. टिळकांना उमेदवारी न दिल्याने आज खुल्या प्रवर्गाचा आवाज दाबण्याचा आज पुन्हा प्रयत्न झाला आहे. सर्वच जातींना योग्य प्रतिनिधित्व मिळालं पाहिजे याच भावनेतून आम्ही हिंदू महासंघ या परिस्थितीवर लक्ष ठेवून आहोत. त्यामुळे कसबा मतदार संघ निवडणूक लढवणार आहोत, असं ते म्हणाले.
कसब्याची निवडणूक चुरशीची आहे. ज्या भाजपची लोकं टिंगल उडवत होते. त्याचवेळी भाजपला वाढण्यासाठी एकमेव ब्राह्मण सामाजने साथ दिली. त्या समाजाला वाळीत टाकण्याचं काम भाजप करताना दिसत आहे. कोथरुड पाठोपाठ कसब्यातही तेच चित्र बघायला मिळालं. जगताप कुटुंबीयांना चिंचवडमध्ये न्याय देण्यात आला, तोच न्याय टिळकांच्या घरात का दिला नाही, असा प्रश्न त्यांनी निर्माण केला आहे.
हिंदू समाजातील सर्व जातींना योग्य प्रतिनिधित्व मिळालं पाहिजे. पुणे जिल्ह्यात 21 आमदार असताना प्रत्येक समाजाचे प्रतिनिधित्व असताना ब्राह्मण समाजाचे प्रतिनिधित्व का डावलले गेले, असा प्रश्न आनंद दवे यांनी भाजपला केला आहे. ब्राह्मण समाजाची मागणी हिंदू महासभा पर्यंत आल्यानंतर मी स्वत: रिंगणात उतरण्याचा निर्णय घेतला आहे. भाजपला ही धोक्याची सुचना आहे. हिंदू महासंघाचा उमेदवार इथं निवडून येईल, अशी माझी खात्री असल्याचे दवे म्हणाले.
कसब्यातील पोस्टर चर्चेत
मागील विधानसभेत सर्वाधिक मतांनी निवडून आलेल्या मेधा कुलकर्णी यांची कोथरुडमधील उमेदवारी नाकारुन चंद्रकांत पाटील यांना देण्यात आली होती, त्यानंतर आता मुक्ता टिळक यांचे घरातील उमेदवारी नाकारण्यात आली. त्यामुळे आता पुण्यात ब्राम्हणांना प्रतिनिधीत्व राहिले नसल्याची खंत एका पोस्टरमधून व्यक्त करण्यात आली आहे.
काय लिहिलंय पोस्टरमध्ये?
कुलकर्णीचा मतदार संघ गेला….
टिळकांचा मतदार संघ गेला….
आता नंबर बापटांचा का ???
..समाज कुठवर सहन करणार ?
कसब्यातील एक जागरुक मतदार
महत्त्वाच्या बातम्या
