Dadar Kabutar Khana: भसाभसा धान्य खाणारे ते थवे कबुतरांचे नव्हे तर पारव्यांचे, मानवी आरोग्यासाठी अत्यंत धोकादायक का?
Dadar Kabutar Khana: रानटी पारव्यांच्या विष्ठेमुळे आणि पिसांमुळे श्वसनाचे गंभीर आजार होतात. त्यामुळे कबुतरखान्यांवर बंदी आणली असली तरी जैनधर्मीयांकडून विरोध सुरु आहे.
Dadar Kabutar Khana: मुंबईतील कबुतरखाने बंद करण्यावरून सध्या वाद सुरु आहे . मात्र भूतदया म्हणून ज्यांना धान्य खायला घातलं जात ती कबुतरे नसून पारवे आहेत . या पारव्यांची संख्या मुंबईतच नव्हे तर पुणे (Pune News) आणि इतर शहरांमध्ये गेल्या काही वर्षांमध्ये कमालीची वाढली आहे . हे पारवे मानवाला तर धोकादायक आहेतच त्याचबरोबर त्यांच्या वाढलेल्या संख्येमुळं निसर्गातील समतोल बिघडून चिमण्या (Sparrow) आणि इतर पक्षी नाहीसे झालेत . पारवे (Parve) आणि कबुतरं यांच्यात नक्की काय फरक आहे हे आधी लक्षात घेतले पाहिजे.
सध्या कबुतरांना खायला घालण्यावरून जो वाद सुरु आहे तो फक्त मुंबई पुरता मर्यादित नाही . पुणे असेल किंवा अन्य शहरं अनेक ठिकाणी पक्षांना खायला घालण्यावरून संघर्ष पाहायला मिळतो आहे . पण असं खायला घालणाऱ्यांना हे कितपत ठाऊक आहे की ज्यांना ते दाणे टाकतायत ती कबुतरं नाहीत तर आरोग्याला हानिकारक असे पारवे आहेत. पुण्यातील मुठा नदीच्या पात्रात हे पारवे अक्षरश: हजारोंच्या संख्येने पाहायला मिळत आहेत. कारण त्यांना खायला घालणाऱ्यांची संख्या मोठी आहे .
मुंबईतील 51 कबुतरखाने बंद करण्यावरून सध्या मोठा वाद सुरु आहे . पण फक्त मुंबईच नाही तर पुणे आणि इतर शहरांमध्ये देखील हे पारवे संघर्षाचं कारण बनले आहेत. या पारव्यांमुळे फुफ्फुसांचे अनेक गंभीर आजार उद्भवत असल्यानं मुंबई प्रमाणे पुण्यात देखील या पारव्यांना दाणे टाकण्यास बंदी आहे . तरीही पुण्याच्या नदी पात्रात हजारोंच्या संख्येत पारवे आढळून येत आहेत. पुण्यातील नारायण पेठेतील दोघांचा या पारव्यांमुळे आजारी पडून मृत्यू झाल्याचं स्थानिकांचं म्हणणे आहे.
Pune News: पुण्यातही रानटी पारव्यांचा त्रास
या पारव्यांना कोणी खायला टाकू नये यासाठी पुणे महापालिकेकडून आरोग्य निरीक्षक नदी पात्रात तैनात करण्यात आलेत . कोणी दाणे टाकताना आढळल्यास त्याला पाचशे रुपये दंड ठोठावला जातोय . मात्र, तरीही या पारव्यांना पोत्याने दाणे टाकले जात आहेत, अशी माहिती पुणे महानगरपालिकेच्या अधिकाऱ्यांनी दिली. वाढत्या शहरीकरणामध्ये सगळीकडे सिमेंट काँक्रीटच्या इमारती उभ्या राहिल्यात . त्यामुळं एकीकडे चिमण्यांसारखे पक्षी नाहीसे होत गेलेत . मात्र पारवे इमारतीला लागून असलेल्या प्लास्टिकच्या ड्रेनेज पाईपमध्ये हे घरटं करत असल्याने त्यांची संख्या प्रचंड वाढलीय . या पारव्यांच्या विष्ठेतून श्वसनाचे अनेक गंभीर आजार उद्भवतायत असं तज्ज्ञांचं म्हणणे आहे.
दुसरीकडे जी खरी कबुतरं आहेत, ती मात्र या पारव्यांमुळे नाहक बदनाम होत आहेत . या कबुतरांच्या थव्यांना ढाबळ असं म्हटलं जात . अशा ढाबळी पुण्यात मोठ्या संख्येने आहेत . या ढाबळीमध्ये पांढरी , बदामी , हिरवी , निळ्या रंगाची , वेगवगेळ्या छटा असलेली सुंदर कबुतरं पाहायला मिळतात . रंगवरूनच या कबुतरांची नावंही ठरतात . पाचशे रुपयांपासून ते एक लाख रुपयांपर्यंत या कबुतरांची त्यांच्या सौदर्यांवरुन किंमत ठरते. एकीकडे पारवे हे रानटी आहेत , तर कबुतरं पाळीव आहेत . पारवे कुठेही घरटं करतात तर कबुतरं मालकासोबत एकनिष्ठ असतात . कितीही दूर गेली तरी ती मालकाकडे परत येतात .
Pune Piegons: कबुतर आणि पारव्यांमध्ये नक्की फरक काय?
कबुतर हा पूर्वीपासून मानवाचा विश्वासू पक्षी राहिलाय . पूर्वीच्या काळी संदेश एका ठिकाणावरून दुसरीकडे पाठ्वण्यासाठी कबुतरांचा उपयोग केला जायचा . आज देखील ही कबुतरं शेकडो किलोमीटरचा प्रवास करून मालकाकडे परत येतात असं या ढाबळ मालकांचं म्हणणंय . पुण्यातून सातारच नव्हे तर चेन्नई पर्यंतचा प्रवास या कबुतरांनी केल्याचं या ढाबळ मालकांचं म्हणणे आहे.
पुण्य गाठीशी बांधण्यासाठी पारव्यांना दाणे टाकणाऱ्यांनी पारवे आणि कबुतरं यांच्यातील हा फरक समजून घेणायची गरज आहे . पक्ष्यांबद्दल भूतदया दाखवणाऱ्यांनी या पारव्यांचा मानवाला किती त्रास होतोय, याची जाणीव ठेवण्याची गरज आहे . पुण्याचा बॅलन्स वाढावा यासाठी कबुतर म्हणून पारव्यांना खायला घातलं जातंय आणि त्यामुळं ही सुंदर कबुतरं नाहक बदनाम होतायत . दुसरीकडे या पारव्यांची संख्या इतकी वाढलीय की निसर्गातील समतोल बिघडलाय, चिमण्यांसारखे पक्षी नाहीसे होतायत , मानवाला धोका निर्माण झाला आहे. त्यामुळे पारव्यांना खायला घालणाऱ्यांनी थोडीशी भूतदया मानवासाठी देखील राखून ठेवायला हवी.
आणखी वाचा
महत्त्वाच्या बातम्या
