Tejas Thackeray On Nitesh Rane: तुम्ही दुर्मिळ प्रजाती शोधता, आंदोलनात कोणत्या प्रजाती शोधायला आलात?; तेजस ठाकरेंना प्रश्न विचारताच म्हणाले...
Tejas Thackeray On Nitesh Rane: ठाकरे गटाचे नेते आदित्य ठाकरे आणि मनसेचे नेते अमित ठाकरे यांच्यासोबत तेजस ठाकरेही सेना भवन परिसरात दाखल झाले होते.
Tejas Thackeray On Nitesh Rane: मुंबईतील शिवाजी पार्क आणि सेना भवन परिसरात 11 ऑक्टोबर रोजी कॉकरोच जनता पार्टीच्या आंदोलनाच्या (CJP Protest) समर्थनार्थ जमलेल्या कार्यकर्त्यांना पोलिसांनी ताब्यात घेतल्यानंतर शिवसेना ठाकरे गट आणि मनसेचे नेते आक्रमक झाले. ठाकरे गटाचे नेते आदित्य ठाकरे (Aaditya Thackeray) आणि मनसेचे नेते अमित ठाकरे (Amit Thackeray) यांच्यासोबत तेजस ठाकरेही (Tejas Thackeray) सेना भवन परिसरात दाखल झाले. आंदोलनकर्त्यांच्या सुटकेसाठी झालेल्या ठिय्या आंदोलनात तेजस ठाकरे सहभागी झाले होते. या घडामोडींमुळे ठाकरे कुटुंबातील आणखी एक सदस्य सक्रिय राजकीय भूमिकेत दिसू लागल्याची चर्चा रंगली आहे.
माजी मुख्यमंत्री आणि शिवसेना उद्धव बाळासाहेब ठाकरे पक्षाचे पक्षप्रमुख उद्धव ठाकरे (Uddhav Thackeray) यांचे पुत्र आणि आदित्य ठाकरे यांचे बंधू असलेले तेजस ठाकरे हे प्रामुख्याने वन्यजीव संशोधन आणि जैवविविधतेशी संबंधित कामासाठी ओळखले जातात. आदित्य ठाकरे यांनी विद्यार्थी राजकारणापासून निवडणुकीच्या राजकारणापर्यंत सक्रिय भूमिका घेतली. मात्र, तेजस ठाकरे यांची सार्वजनिक प्रतिमा तुलनेने राजकारणापासून दूर राहिलेल्या व्यक्तीची राहिली आहे. त्यामुळे तेजस ठाकरेंच्या राजकीय सहभागावरुन मंत्री आणि भाजपचे नेते नितेश राणे यांनी टीका केली होती.
तेजस ठाकरे नेमकं काय म्हणाले? (Tejas Thackeray On Nitesh Rane)
नवीन प्रजातीचे किडे सापडले असतील म्हणून तेजस ठाकरे शिवाजी पार्कमधील आंदोलनाला आले असतील, असं विधान नितेश राणेंनी केलं होतं. आता नितेश राणेंच्या टीकेला देखील तेजस ठाकरेंनी प्रत्युत्तर दिलं आहे. तुम्ही दुर्मिळ प्रजाती शोधता, आंदोलनात कोणत्या प्रजाती शोधायला आलात?, असा प्रश्न पत्रकारांनी तेजस ठाकरेंना विचारला. यावर माणसांचे हक्कच दुर्मिळ झाले आहेत त्यांचा शोध घेण्यासाठी आलोय, असं तेजस ठाकरेंनी उत्तर दिलं. तेजस ठाकरेंनी दिलेल्या या उत्तराची चर्चा सध्या राजकीय वर्तुळात रंगली आहे.
भावांच्या खांद्याला खांदा लावून तेजस ठाकरेंनी पोलिसांची गाडी आडवली- (Shivsena UBT Tejas Thackeray)
तेजस ठाकरे म्हणजे वन्यजीव संशोधनाच्या क्षेत्रात काम करणारे असा त्यांचा आतापर्यंतचा परिचय. मात्र, रविवारी झालेल्या आंदोलनात शिवसेना भवन परिसरात आदित्य आणि अमित ठाकरे भूमिका मांडत असताना, भावांच्या खांद्याला खांदा लावून पोलिसांची गाडी अडवून धरणारे तेजस ठाकरे हे पाहायला मिळाले. याआधीही अनेक वेळा तेजस ठाकरे यांच्या राजकीय कार्यक्रमांच्या उपस्थितीने तेजस ठाकरे राजकारणात येणार? अशा चर्चा रंगल्या होत्या अशातच रविवारी पोलिसांच्या गाडीसमोर हात खुले करून उभे राहिल्याने पुन्हा या चर्चांना उधाण आले आहे.
आंदोलनात 'प्रजाती'वरुन प्रश्न, तेजस ठाकरेंचं ऐकण्यासारखं उत्तर, VIDEO:
महत्त्वाच्या बातम्या
