नागपूर: लवकरच भाजपमध्ये (BJP) ज्यांचा प्रवेश होणार आहे, त्या एकनाथ खडसे (Eknath Khadse) यांनी उपमुख्यमंत्री फडणवीसांबद्दल (Devendra Fadnavis) मोठं वक्तव्य केलं आहे. फडणवीस, महाजन आणि गुलाबराव पाटलांचा माझ्या भाजप प्रवेशाला विरोध नाही, त्यांची नाराजी आता दूर झाली आहे असं खडसे म्हणाले. माझा भाजपमध्ये प्रवेश होणार हे खुद्द विनोद तावडेंनी घोषित केल्यामुळे मी निश्चिंत आहे असं खडसे म्हणाले. ते एबीपी माझाशी बोलत होते.
एकनाथ खडसे म्हणाले, मी भाजपमध्ये आल्यानंतर मला आणि महाजन दोघांना एकत्रित काम करावेच लागेल. माझा भाजपमध्ये प्रवेश होईल हे तावडे यांनी सांगितले आहे, म्हणून मी निश्चिंत आहे. दरम्यान, माझ्या भाजप प्रवेशाबद्दल गिरीश महाजन, गुलाबराव पाटील, देवेंद्र फडणवीस या तिघांचा आता विरोध नाही मुळात विरोध नव्हताच, त्यांचे नाराजीचे सूर होते. ती नाराजी आता दूर झाली आहे.
नाराजी दूर करण्याचे प्रयत्न मी करत आहे : एकनाथ खडसे
भाजपचे केंद्रीय महामंत्री विनोद तावडे यांनी स्पष्ट भूमिका मांडली आहे की नाथाभाऊ यांचा भाजप प्रवेश होईल, म्हणून मी त्याबाबतीत निश्चिंत आहे. मी भाजप मध्ये येणार या मुद्द्यावर काही लोकांची नाराजी होतीच, एवढे वर्ष सोबत काम केले होते, म्हणून सर्व गुणगान करतील असे होत नाही. काही लोक दुखावले जातात, त्यांच्या नाराजीचा परिणाम अशा गोष्टींवर (पक्ष प्रवेश) होत असतो. जे नाराज आहेत, त्यांची नाराजी दूर करण्याचे प्रयत्न मी करत आहे. भाजपमध्ये आल्यानंतर मला आणि महाजन दोघांना एकत्रित काम करावेच लागेल. पक्षाच्या हितासाठी काम करण्याचा निर्णय आम्ही दोघे मिळून घेऊ. गिरीश महाजन, गुलाबराव पाटील, देवेंद्र फडणवीस या तिघांचा आता विरोध नाही.. विरोध नव्हता, त्यांचे नाराजीचे सूर होते.
भाजपमध्ये प्रवेश केल्यानंतर भाजपचा काम करणार: एकनाथ खडसे
एकनाथ खडसे म्हणाले, भाजपमध्ये येताना मी रोहिणी खडसे यांना भाजपमध्ये येण्यास सांगितले होते. मात्र त्यांनी नाकारले आणि शरद पवार यांच्या सोबत राहील असे सांगितले. तिला पुढची निवडणूक लढवायची आहे, तिला तिथे भविष्य दिसतोय,म्हणून ती राष्ट्रवादी शरद पवार गटात राहील. मी भाजपमध्ये प्रवेश केल्यानंतर भाजपचा काम करणार आहे. मी यापुढे निवडणूक लढवणार नाही, मला निवडणूक लढविण्याची इच्छा नाही. मी अजून ही पाच वर्ष परिषदेचा आमदार आहे. पवारांनी सांगितले आहे आम्ही दिलेली वस्तू परत घेत नाही. मला शरद पवार यांनी अभय दिल्यानंतर इतर लोकं माझा विधान परिषदेचा राजीनामा मागत असतील तर मला त्याच्याशी देणंघेणं नाही.
निवडणूक लढवण्याकडे कल नाही: एकनाथ खडसे
मी राजकीय माणूस, मी राजकीय निवृत्ती घेतलेली नाही, राजकारणात पुढे काही ही होऊ शकते, मात्र, आता माझे निवडणूक लढवण्याकडे कल नाही. शरद पवारांना पक्ष सोडताना काय सांगितले, हे आता सांगणार नाही, काही गोष्टी माझ्यासाठी राखीव राहू द्या. रावेरची निवडणूक जाहीर झाल्यापासून मी भाजपमध्ये प्रवेश करण्याचे सुचित केले होते. भाजपमध्ये प्रवेश करणार असल्यामुळे भाजपचा प्रचार करावा, तसेच रक्षा खडसे माझ्या सून आहे, या दोन्ही भूमिकेतून मी भाजपचा प्रचार करत आहे. निवडणूक भाजप लढवत आहे, मी जोडीला मदत करत आहे, असे एकनाथ खडसे म्हणाले.
Eknath Khadse Video:
हे ही वाचा :