Devendra Fadnavis On Manoj Jarange: मनोज जरांगेंचं उपोषण 90 दिवसांसाठी स्थगित; देवेंद्र फडणवीसांची पहिली प्रतिक्रिया, म्हणाले...

Devendra Fadnavis On Manoj Jarange: मनोज जरांगेंनी उपोषण स्थगित केल्यानंतर मुख्यमंत्री देवेंद्र फडणवीस यांनी पहिली प्रतिक्रिया दिली. 

Devendra Fadnavis On Manoj Jarange

Source : ABP

Devendra Fadnavis On Manoj Jarange: मराठा आंदोलक मनोज जरांगे-पाटील यांनी आज (17 सप्टेंबर) उपोषण स्थगित (Manoj Jarange Patil Protest) करण्याचा निर्णय घेतला. सरकारच्या शिष्टमंडळाच्या भेटीनंतर मनोज जरांगेंनी 90 दिवसांसाठी उपोषण स्थगित करण्याचा निर्णय जाहीर केला. तसेच उपोषण स्थगित केलंय, मात्र आंदोलन सुरुच राहणार, असं मनोज जरांगेंनी स्पष्ट केलं. मनोज जरांगे यांनी सरकारला 90 दिवसांची मुदत दिली आहे. जीआर काढून गॅझेटियरची अंमलबजावणी करावी. 58 लाख नोंदींमधील एकही नोंद कमी व्हायला नको...नोंदी कमी करणार नाही, याची लेखी हमी द्यावी, अशी मागणी मनोज जरांगेंनी केली. जर सरकारने धोका दिला, तर आम्ही मुंबई गाठणार, असा इशाराही मनोज जरांगे यांनी दिला. तसंच मुंबईत गेलेल्या 1 लाख 07 हजार समर्थकांनी माघारी यावं असं आवाहन देखील मनोज जरांगेंनी केलं आहे.

मनोज जरांगेंचं उपोषण स्थगित, देवेंद्र फडणवीस काय म्हणाले? (Devendra Fadnavis On Manoj Jarange)

मनोज जरांगेंनी उपोषण स्थगित केल्यानंतर मुख्यमंत्री देवेंद्र फडणवीस (Devendra Fadnavis) यांनी पहिली प्रतिक्रिया दिली. मनोज जरांगेंनी उपोषण स्थगित केल्याचा मला आनंद आहे. मनोज जरांगेंच्या 13 मागण्यांपैकी 12 मागण्या आम्ही मान्य केल्या होत्या. एका मागणीबाबत आम्ही त्यांना कायदेशीर अडचणी सांगितल्या होत्या. त्यामुळे आम्ही ज्या मागण्या मान्य केल्या आहेत, समितीने जे काही आश्वसनं दिली आहेत, ते सर्व आम्ही पूर्ण करु, असं देवेंद्र फडणवीस म्हणाले. तसेच आमचे निर्णय आधीच झाले आहेत, काही प्रशासकीय अडचणी आहेत, त्या दूर करायच्या आहे, तेही आम्ही करु...सरकार नेहमीच सकारात्मक राहिलंय. आमचे दरवाजे नेहमी उघडे आहेत. मराठा समाजासाठी मी आणि एकनाथ शिंदे यांनी निर्णय घेतले, तेवढे निर्णय कधीच कोणी घेतले नाही. मराठा समाजाला जे काही मिळालं, ते आमच्या काळात मिळालेलं आहे, असंही देवेंद्र फडणवीस म्हणाले. आता कुठल्याही सणामध्ये विघ्न न येता, आज हे उपोषण स्थगित झालंय, याचा मला आनंद आहे, असंही देवेंद्र फडणवीसांनी सांगितले.  

मनोज जरांगेंना सरकारने कोणती हमी दिली? (What assurance did the government give to Manoj Jarange?)

• सातारा, कोल्हापूर, पुणे, औंधचं गॅझेट तीन महिन्यांत जीआर काढून लागू करु
• हैदराबाद गॅझेटनुसार कुणबी प्रमाणपत्रे देण्यासाठी सुधारीत जीआर काढू
• हैदराबाद गॅझेटनुसार प्रमाणपत्रांना वैधता देणं चालूच राहील
• शिंदे समितीस मिळालेल्या 58 लाख नोंदी घटवणार नाही 
• मराठवाडयातील 4 लोकप्रतिनिधींची रद्द केलेली कुणबी प्रमाणपत्रे वैध करु

देवेंद्र फडणवीस, एकनाथ शिंदे माझे वैरी नाहीत- मनोज जरांगे (Manoj Jarange On Devendra Fadnavis And Eknath Shinde)

आज सकाळी 5 वाजता सरकारचं शिष्टमंडळ मनोज जरांगेंच्या भेटीसाठी बीडमधील पाटोदा येथे दाखल झालं होतं. यामध्ये मंत्री राधाकृष्ण विखे, मंत्री दादा भुसे, आमदार प्रसाद लाड, आमदार सुरेश धस यांचा समावेश होता. जवळपास 1.30 तास मनोज जरांगे आणि सरकारच्या शिष्टमंडळ यांच्यात चर्चा झाली. यावेळी मनोज जरांगे यांनी विविध मुद्द्यांवर भाष्य केलं. मराठा समाजाला खुन्नस देणं चांगलं नाही. चर्चा न करणारे आज चर्चेसाठी आले की नाही?, आरक्षणापेक्षा समाजाची इज्जत महत्वाची आहे, असं मनोज जरांगे म्हणाले. मुख्यमंत्री देवेंद्र फडणवीस (Devendra Fadnavis), उपमुख्यमंत्री एकनाथ शिंदे (Eknath Shinde) माझे वैरी नाहीत. पण समोरुन वार आलं, तर काय करणार?, असा सवालही मनोज जरांगेंनी उपस्थित केला. तसेच राधाकृष्ण विखे चुकत असले तरी त्यांच्यावर प्रेम करा. एकनाथ शिंदेंवरही प्रेम करु पण आता नाही. मंत्र्यांनी टीका केली तर आम्ही गप्प बसणार नाही, असंही मनोज जरांगेंनी स्पष्ट केलं. 

मनोज जरांगे-पाटील आणि सरकारच्या शिष्टमंडळाची संपूर्ण पत्रकार परिषद, VIDEO:

संबंधित बातम्या: