एक्स्प्लोर

Pahalgam Terror Attack: पाकिस्तानची 'टेरर फॅक्टरी'..., मारल्या गेलेल्या दहशतवाद्यांकडे सापडले धक्कादायक पुरावे; पाकिस्तान आर्मीचे एसएसजी कमांडोच करताय घुसखोरी

Pahalgam Terror Attack: जम्मू काश्मीरमधील पहलगाममध्ये पर्यटकांवर झालेल्या हल्ल्याचा मास्टरमाईंड हाशिम मुसा असल्याचं समोर येत आहे.

Written By : सोमेश कोलगे | Edited By: मुकेश चव्हाण | Updated at : 30 Apr 2025 09:59 AM (IST)

Pahalgam Terror Attack

Source : ABP

Pahalgam Terror Attack: जम्मू-काश्मीरमधील पहलगाममधील हल्ल्यानंतर (Pahalgam Terror Attack) पाकिस्तानच्या 'टेरर फॅक्टरी'ची धक्कादायक माहिती एबीपी माझाच्या हाती लागली आहे. पाकिस्तान आर्मीचे एसएसजी कमांडोच दहशतवादी होऊन भारतात घुसखोरी करताय, असं समोर आले आहे. दहशतवादी आणि पाकिस्तानी कमांडो हाशीम मुसा याआधी देखील काश्मीरमध्ये आला होता.

जम्मू काश्मीरमधील पहलगाममध्ये पर्यटकांवर झालेल्या हल्ल्याचा मास्टरमाईंड हाशिम मुसा असल्याचं समोर येत आहे. हाशिम मुसा गेल्या अनेक महिन्यांपासून काश्मीरमधल्या दहशतवादी कारवायांमध्ये सक्रिय असल्याची माहिती आहे. मुसाचं पाकिस्तानी सैन्याशी असलेलं कनेक्शन उघड झालंय. पण त्याचं थेट पाकिस्तानी गुप्तचर यंत्रणा आयएसआयशीही काही संबंध आहे का याचाही शोध घेतला जातोय. याचदरम्यान एक धक्कादायक माहिती समोर आली आहे.

पाकिस्तानात फाशीची शिक्षा झालेल्यांची दहशतवादी कारवायांसाठी भरती-

दहशतवादी आणि पाकिस्तानी कमांडो हाशीम मुसा याआधीही आला काश्मिरात होता. पाकिस्तानात फाशीची शिक्षा झालेल्यांची दहशतवादी कारवायांसाठी भरती होते. याबाबत मारल्या गेलेल्या दहशतवाद्यांकडे सापडलेल्या ऐवजातून पुरावे आढळले आहेत. त्यामुळे भारत पाकिस्तानच्या टेरर फॅक्टरीचे पुरावे जगासमोर ठेवणार आहे.

फाशीची शिक्षा झालेल्याला तुरुंगातून सोडले अन्...-

ऑगस्ट 2024 मध्ये, भारतीय सैन्याने नियंत्रण रेषेच्या तंगधार सेक्टरमध्ये घुसखोरी करताना झहीर अहमद अब्बास नावाच्या दहशतवाद्याला ठार मारले होते. त्यानंतर तपासात असे दिसून आले की झहीर अहमद अब्बासला यापूर्वी रावळपिंडी मध्यवर्ती तुरुंगात ठेवण्यात आले होते. झहीर अहमद अब्बासला एका फौजदारी खटल्यात मृत्युदंडाची शिक्षा झाली होती. पण पाकिस्तानी गुप्तचर संस्था आयएसआयने झहीरला तुरुंगातून सोडले, त्याला जिहादी बनवले आणि भारतात दहशत पसरवण्यासाठी पाठवले. रावळपिंडी तुरुंगातील अधिकाऱ्यांनी स्वतः झहीर अहमद अब्बासच्या फाशीबद्दल सोशल मीडियावर पोस्ट केली होती.