डॉक्टर रुग्णांच अनोख नातं, यशस्वी ऑपरेशन झालं, रुग्णाने कलेतून मानले आभार
Nashik Latest News update: घराची परिस्थिती हलाखीची. त्यातच दुष्काळात तेरावा म्हणतात तसे अचानक दोन्ही पायाचे खुबे अकाली निकामी झालेले.
Nashik Latest News update: घराची परिस्थिती हलाखीची. त्यातच दुष्काळात तेरावा म्हणतात तसे अचानक दोन्ही पायाचे खुबे अकाली निकामी झालेले. अनेक दवाखान्यांत घिरट्या घातल्या, मात्र कुठे खर्च परवडेनासा तर कुठे निदान होत नव्हते. अखेर कंटाळून पुन्हा ते घरी परतले. यानंतर नाशिकच्या एसएमबीटी रुग्णालयात दाखल झालेल्या या रुग्णाचे दोन्हीही पायाच्या खुब्यांवर यशस्वी सांधेरोपण करण्यात आले. या रुग्णावर यशस्वी शस्रक्रिया झाल्यानंतर रुग्णाने ऑपरेशन करणाऱ्या डॉक्टरांचे अनोखे चित्र रेखाटत डॉक्टरांचे आभार मानले.
घटना आहे जळगाव जिल्ह्यातील भुसावळ येथील मूळ रहिवाशी असलेले संदीप मुरलीधर बोधडे यांची. बोधडे सध्या कुटुंबीयांसोबत नाशिक जिल्ह्यातील मनमाड येथे वास्तव्यास आहेत. ते कलाकार असून घरची परिस्थिती हलाखीची असल्याने त्यांनी अनेक दवाखाने पालथे घातले. मात्र, दवाखान्याचा खर्च त्यांच्या आवाक्याबाहेरचा होता. यानंतर त्यांच्या एका मित्राने एसएमबीटी हॉस्पिटलमध्ये जाण्याचा सल्ला दिला. यानंतर ते रुग्णालयात दाखल झाले. त्यांनी ओपीडीमध्ये डॉक्टर मनोज काशिद यांच्याकडे तपासणी केली. सर्व घरची परिस्थिती आणि आतापर्यंत विविध दवाखान्यांत मारलेले हेलपाटे याबाबत सगळी धावपळ कथन केली.
डॉ. काशिद यांनी तात्काळ या रुग्णाला दवाखान्यात दाखल करून घेतले. थोड्याच दिवसांत त्यांचा खुबा सांधेरोपण करण्यात आले. महिन्याभारत दुसऱ्याही खुब्यावर शस्रक्रिया यशस्वी झाली. विशेष म्हणजे, सर्वकाही महात्मा ज्योतिबा फुले जनआरोग्य योजनेच्या माध्यमातून मोफत झाल्यामुळे त्यांना आर्थिक अडचणीला देखील सामोरे जायला लागले नाही.
दरम्यान, बोधले यांनी त्यांच्यावर यशस्वी उपचार करणाऱ्या डॉ. काशिद यांचे अनोख्या प्रकारे आभार मानण्याचे ठरवले. त्यांना डॉ काशिद यांचा फोटो मिळत नव्हता; यानंतर त्यांनी सोशल मीडियात त्यांचे फोटो शोधले. फेसबुकवरून त्यांचा एक फोटो बोधले यांनी शोधून काढला. कुणालाही काहीही न सांगता या रुग्णाने डॉ काशिद यांचे चित्र रेखाटण्यास सुरुवात केली. शस्रक्रीयेच्या चार पाच दिवसांनी जेव्हा डॉ काशिद या रुग्णाला भेटण्यासाठी आले, तेव्हा बोधले यांनी एका कागदावर डॉ काशिद यांचे पेन्सिलीच्या सहाय्याने रेखाटलेले एक चित्र त्यांना भेट दिले. हे चित्र हुबेहुब डॉ. काशिद यांचेच असल्याचे पाहून उपस्थित डॉक्टरांसह सर्वांनाच आश्चर्याचा धक्का बसला.
आपण कधी चालू शकू की नाही असा काही दिवसांपूर्वी प्रश्न पडलेल्या बोदडे यांना चालता येऊ लागल्याने त्यांचा आनंद गगनात मावेनासा झाला. यानंतर बोधले यांनी येथील अनेक वैद्यकीय अधिकाऱ्यांचे चित्र रेखाटून दिले. एकूणच कोणत्याही दुर्धर आजारावर मात करता येणं शक्य आहे, ज्यावेळी डॉक्टरांसोबत आपल्या मनातील निस्वार्थी भावना बेमतलब काम करत असतात. त्यावेळी निष्ठेने केलेल्या कष्टाचे फळ हमखास मिळते, हे या घटनेवरून दिसून येते.
संबंधित रुग्णाचे वय कमी असल्याने रुग्णाला चालताना बघायचे होते. आवश्यक त्या प्रक्रिया पूर्ण केल्यानंतर ऑपरेशनचा निर्णय घेतला. टप्प्याटप्प्याने दोन्ही ऑपरेशन यशस्वी करण्यात आले. या रुग्णाने माझे व पत्नीचे जे हुबेहूब चित्र रेखाटले यामुळे खरच भारावलो. रुग्णांच्या प्रति डॉक्टरांचे असलेले कष्ट आणि डॉक्टरांच्या प्रति रुग्णांचे असलेले प्रेम यातून दिसते. रुग्णालयात अनेक रुग्ण येतात त्यांच्याकडून आपण केलेल्या उपचारांची दखल घेतली जाते. दोन गोड शब्द कानावर आले की केलेल्या कार्याचे चीज झाल्याचे अस्थिरोग तज्ञ डॉ. मनोज काशिद यांनी सांगितले.
महत्त्वाच्या बातम्या
