Nashik Gram Panchayat Election 2022 : नाशिक जिल्ह्यात सहा ग्रामपंचायत बिनविरोध, 188 ग्रामपंचायतींसाठी मतदान प्रक्रिया सुरू

Maharashtra Gram Panchayat Election 2022 : नाशिक जिल्ह्यात सुरगाणा वगळता 14 तालुक्यातील 196 गावांमध्ये ग्रामपंचायत निवडणुकीला सुरुवात झाली आहे.

Nashik Gram Panchayat Election 2022 : राज्यभरात ग्रामपंचायतीची रणधुमाळी (Maharashtra Gram Panchayat Election 2022) सुरू असून आज नाशिक जिल्ह्यातही (NashikGram Panchayat Election) मतदान प्रक्रिया राबवली जात आहे. नाशिक जिल्ह्यातील इगतपुरी 2, कळवण 15, चांदवड 34, त्र्यंबकेश्वर 1, दिंडोरी 5, देवळा 13, नांदगाव 14, नाशिक 13, निफाड 20, पेठ 01, बागलाण 38, येवला 7, सिन्नर 12 आणि मालेगावच्या 13 ग्रामपंचायतींचा मतदान प्रक्रिया सुरू झाली आहे.

नाशिक जिल्ह्यात सुरगाणा वगळता 14 तालुक्यातील 196 गावांमध्ये ग्रामपंचायत निवडणुका घोषित करण्यात आल्या होत्या. यातील 08 ग्रामपंचायत बिनविरोध झाल्या असून 188 ग्रामपंचायतींमध्ये मतदान प्रक्रियेला सुरुवात झाली आहे. यामध्ये पिंपळगाव बसवंत, नांदूर शिंगोटे, दाभाडी, वडाळीभोई, उमराळे, डांगसौंदाणे, गिरणारे, एकलहरे या ग्रामपंचायतींमध्ये चुरशीच्या लढती होणार आहेत.

पालकमंत्री दादा भुसेंचे मालेगाव, आमदार छगन भुजबळांचा मतदार संघ येवला, शिंदे गटाचे आमदार सुहास कांदेंच्या नांदगाव मध्ये निवडणुका लागल्याने त्यांची प्रतिष्ठा पणाला लागलीय. विशेष म्हणजे केंद्रीय आरोग्य राज्यमंत्री भारती पवार या खासदार असलेल्या दिंडोरी लोकसभेच्या मतदारसंघातील 7 तालुक्यात निवडणुका होत आहेत.

नाशिक जिल्ह्यात 196 ग्रामपंचायतीसाठी निवडणूक

नाशिक जिल्ह्यात एकूण 196 ग्रामपंचायतीसाठी निवडणूक प्रक्रिया राबविण्यात येत आहे. यामध्ये 07 ग्रामपंचायत बिनविरोध ग्रामपंचायती आहेत. तर 19 बिनविरोध सरपंच, 579 बिनविरोध सदस्य आहे. दरम्यान 1291 जागांवर मतदान होणार आहे. यातील 177 सरपंचासाठी मतदान पार पडणार आहे. यासाठी जिल्ह्यात 745 मतदान केंद्रावर मतदान प्रक्रिया सुरू झाली आहे. एकूण सदस्य पदासाठी 2897 तर सरपंच पदासाठी 577 उमेदवार रिंगणात आहेत.

बिनविरोध ठरलेल्या 7 ग्रामपंचायती 

बागलाण तालुका - किकवारी बु, ढोलबारे, महड.. नाशिक तालुका - कोटमगाव.. चांदवड तालुका - नारायणगाव.. कळवण तालुका - जयपूर.. नांदगाव तालुका - शास्त्रीनगर

राज्यात 7751 ग्रामपंचायतींसाठी मतदान (Maharashtra Gram Panchayat Election 2022)

राज्यातील ग्रामपंचायतींच्या सदस्यपदांसह थेट सरपंचपदाच्या (Sarpanch Election) आज 18 डिसेंबर रोजी मतदान होत आहे. राज्यातील विविध जिल्ह्यांतील 7 हजार 751 ग्रामपंचायतींच्या सदस्यपदांसह थेट सरपंचपदाच्या सार्वत्रिक निवडणुकीसाठी आज मतदान होणार आहे. सकाळी 7.30 ते संध्याकाळी 5.30 या वेळेत मतदान होईल. नक्षलग्रस्त भागात दुपारी 3 वाजेपर्यंत मतदानाची वेळ असेल. मतमोजणी 20 डिसेंबरला होईल.