Nashik Graduate Constituency : राज्यातील पाच जागांच्या निवडणूक निकालासह नाशिक पदवीधर निवडणुक (Nashik Graduate Constituency) मतमोजणीकडे राज्याचे लक्ष लागले आहे. दरम्यान आज सकाळपासून मतमोजणीला सुरुवात झाली आहे. सत्यजित तांबे आणि शुभांगी पाटील यांच्यामध्ये चुरस सध्या पाहायला मिळते. नाशिक पदवीधर निवडणुकीच्या मतमोजणीकडे राज्याचे लक्ष लागले असून या निवडणुकीत सत्यजित तांबे विजयी होतात की शुभांगी पाटील विजयी होतात हे पाहणे महत्वाचे ठरणार आहे. सत्यजित तांबे, शुभांगी पाटील दोघेही अपक्ष उमेदवार असले तरी शुभांगी पाटील यांना महाविकास आघाडीचा पाठिंबा आहे. महाविकास आघाडीच्या उमेदवार म्हणून त्या निवडणूक लढवत आहेत.
दरम्यान अडीच वाजता मतमोजणीला (Vote Couting) सुरुवात झालेली आहे. पहिल्या फेरीचा मतमोजणी आता केली जात आहे. सत्यजित तांबे (Satyajeet Tambe) यांचा अकरावा नंबर असून शुभांगी पाटील (Shubhangi Patil) यांचा अनुक्रमांक हा चौदावा आहे. दरम्यान दोन्ही ठिकाणी मतपत्रिका मोठ्या प्रमाणावर पडत असून तर 28 टेबलांपैकी 17 वा नंबर आहे. तो अवैध म्हणजेच बाद मतांसाठी राखीव ठेवण्यात आला आहे. या ठिकाणी देखील मोठ्या प्रमाणावर मतपत्रिका पडत आहेत. नाशिक (Nashik) पदवीधर मतदारसंघातील 16 उमेदवारांपैकी फक्त दोन उमेदवारांमध्ये काटे की टक्के राहणार असून यामध्ये सत्यजित तांबे आणि शुभांगी पाटील यांच्यात हा सामना बघायला मिळणार आहे. तर दुसरीकडे पहिल्या फेरीतील मतमोजणी दरम्यान अवैध मतांचे प्रमाण देखील मोठ्या प्रमाणावर असल्याने मतांचा कोटा पूर्ण होऊ शकणार का हे पाहणे देखील महत्त्वाचे ठरणार आहे.
सकाळी आठ वाजता या मतमोजणीला सुरुवात झाल्यानंतर काही तासांमध्ये पहिल्या मतमोजणीला सुरुवात झाली असून सुरुवातीला सर्व मतपेट्या एका सरमिसळ हौदात टाकण्यात आल्या होत्या. त्यानंतर त्या वेगळ्या करण्यात येऊन जवळपास 28 टेबलांवर ठेवण्यात आल्या. जवळपास एक हजार मत पत्रिका त्या त्या टेबलावर ठेवण्यात आल्या. या पत्रिकांपैकी आता वीस वीस चे गठ्ठे केले जात आहेत. एक गठ्ठा पूर्ण झाल्यानंतर दुसरा गठ्ठा मतमोजणीसाठी काढण्यात येत आहे. त्याचबरोबर वैध आणि अवैध मत कुठले आहेत. हे देखील पाहिले जात आहे. एक फेरी म्हणजेच पहिली फेरी पूर्ण होण्यासाठी जवळपास एक ते दीड तासांचा कालावधी हा लागत आहे. त्यामुळे नाशिक पदवीधरचा निकाल हा उशिरापर्यंत लागण्याची शक्यता वर्तवण्यात येत आहे.
बाद मतपत्रिकांची संख्या अधिक
नाशिक पदवीधर मतदारसंघ निवडणूकीच्या मतमोजणीस आज सकाळी आठ वाजेपासून सुरूवात झाली होती. सुरुवातील मतपत्रिकांची छाननी करण्यात आली. त्यानंतर मतपत्रिकांचे वेगवेगळे गठ्ठे करून 28 टेबलांवर ठेवण्यात आले आहेत. पहिल्या फेरीच्या मतमोजणीला सुरुवात झाली असून यातील पहिल्या काही मतपत्रिकांचा अंदाज घेतला असता सत्यजित तांबे आणि महाविकास आघाडीच्या शुभांगी पाटील यांच्यामध्ये अटीटीची लढत होत असल्याचे चित्र सध्यातरी दिसून येत आहे. दरम्यान, यासोबतच बाद मतपत्रिकांची संख्या अधिक असल्याने आता कोटा किती निश्चित होतो? याकडे सर्वांचे लक्ष वेधले आहे. कोटा निश्चितीनंतरच खऱ्या अर्थाने निवडणुकीचे चित्र स्पष्ट होईल.
निवडणूक मतमोजणी केंद्रावर गोंधळ
नाशिक पदवीधर मतदारसंघ निवडणूक मतमोजणी केंद्रावर गोंधळ झाल्याचे पाहायला मिळाले. उमेदवार प्रतिनिधी जास्त झाल्याने गोंधळ निर्माण झाला होता. यावेळी उमेदवार प्रतिनिधीमधेच बाचाबाची झाल्याचे दिसून आले. मतमोजणीच्या वेळी टेबल क्रमांक 13 वर गोंधळ झाल्याने महसूल आयुक्तांनी पोलिसांना पाचारण करण्यात आले.