Nashik Saptshrungi devi : सप्तशृंगी देवी (Saptshrungi Devi) गडावर चैत्रोत्सव यात्रा सुरु असून लाखोंच्या संख्येने भाविक भक्त दर्शनासाठी गडावर येत आहेत. अशातच रविवार (2 एप्रिल) सुट्टीचा आनंद आणि सप्तगशृंगीचे दर्शन घेण्यासाठी महाराष्ट्रातूनच नव्हे तर देशभरातून आणि देशाबाहेरील म्हणजेच जवळपास 23 देशातील भाविकांनी गडावर हजेरी लावल्याचे पाहायला मिळाले.
नाशिक (Nashik) जिल्ह्यातील वणी येथील सप्तशृंगी देवी गडावर (Saptshrungi Gad) चैत्रोत्सव यात्रा सुरु असून रविवारी सकाळपासून रात्री उशिरापर्यंत कळवण, देवळा, सटाणा, मालेगाव रस्त्यावर पायवाटेने हजारोंच्या संख्येने भाविक सप्तशृंगी गडावर जात आहेत. रविवारच्या दिवशी सप्तशृंगी देवीच्या चरणी विदेशी पर्यटकांनी हजेरी लावत देवीची भजनं गायली. सप्तशृंगी देवीचा चैत्रोत्सव (Chaitra Utsava) सुरु असल्याने देवीच्या दर्शनासाठी दररोज हजारो भाविक देवीच्या दर्शनासाठी येत असतात त्यातच सहयोग ध्यान केंद्राच्या माध्यमातून 23 देशांमधल्या 56 विदेशी पर्यटकांनी वणी सप्तशृंगी देवीचे दर्शन घेतले. यावेळी सप्तशृंगी मंदिरात या भाविकांनी जोगवा, गणेश अथर्वशीर्ष तसेच मराठी भजन गात सगळ्यांचेच लक्ष आकर्षित केले. ऑस्ट्रेलिया, जर्मनी, फ्रान्स, टोकियो, इटली, यूएससह 23 देशांमधून हे भाविक गडावर दर्शनासाठी आले होते.
दरम्यान गुरुवारपासून सुरु झालेल्या सप्तशृंगी गडावरील चैत्रउत्सवाला यंदा चांगला प्रतिसाद मिळत आहे. अनेक भागातून भाविक भटक देवीच्या दर्शनासाठी येत आहेत. धुळे (Dhule), नंदुरबार, शिरपूर, दोंडाईचा, रावेर या खानदेश पट्ट्यातूनही माहेरवाशीण दर्शनासाठी हजारो भाविक दाखल होत आहेत. पहिल्या दोन-तीन दिवस भाविकांची फारशी गर्दी नसली तरी रविवारी सुट्टीमुळे त्यात वाढ झाली होती. राज्य परिवहन महामंडळाच्या बसने गडावर जाणाऱ्या भाविकांची संख्या ही मोठी आहे. देवस्थान ट्रस्टकडून दरवर्षीप्रमाणे 24 तास दर्शन खुले करण्यात आले आहे. प्रसादालयात मोफत अन्नदान होत असून त्याचाही लाभ भाविक घेत आहेत. गडावर दर्शनासाठी ठिकठिकाणी पायऱ्यांवर दर्शन बारी लावण्यात आल्या आहेत.
सप्तशृंगी गडावर ई टॉयलेटची सुविधा...
सप्तशृंगी देवीच्या दर्शनासाठी येणाऱ्या भाविकांच्या सुविधांसाठी श्री सप्तशृंग निवासिनी देवी ट्रस्ट मार्फत ई टॉयलेटची सुविधा करण्याचा मानस आहे. या पार्श्वभूमीवर नाशिक पदवीधर मतदारसंघाचे आमदार सत्यजित तांबे यांच्याकडे पाठपुरावा केला होता. आमदार सत्यजित तांबे यांनी केलेल्या पाठपुराव्याच्या माध्यमातून श्री क्षेत्र सप्तशृंगीगड येथे ई-टॉयलेट प्रकारातील अद्ययावत स्वच्छता गृह उभारणीसाठी 50 लक्ष रुपयांचा शासकीय निधी मंजूर झाला आहे. वर्ष 2022-23 अंतर्गत त्याचा पहिला टप्पा रुपये 10 लाख रकमेचा जिल्हा नियोजन समितीच्या अंतर्गत मान्यता क्रमप्राप्त आहे.