नागपुरात वृद्ध दाम्पत्याची हत्या, चोरीच्या उद्देशाने हत्येचा संशय

चंपाती दाम्पत्याच्या डोक्यावर लोखंडी रॉडने हल्ला केल्याचं समोर आलं आहे. लूट, घरफोडीच्या उद्देशाने हे हत्याकांड झाल्याचा पोलिसांचा प्राथमिक अंदाज आहे.

नागपूर : नागपूरमधील वाडीमध्ये एका ज्येष्ठ दाम्पत्त्याची हत्या झाल्याचा प्रकार समोर आला आहे. चोरीच्या उद्देशाने ही हत्या झाल्याचा प्राथमिक अंदाज पोलिसांनी वर्तवला आहे.

नागपूरच्या वाडी पोलीस स्टेशन अंतर्गत येणाऱ्या सुरक्षानगर येथील रहिवाशी 70 वर्षीय शंकर चंपाती आणि त्यांची पत्नी 60 वर्षीय सीमा चंपाती यांची हत्या करण्यात आली आहे. दोघांचे मृतदेह आज संध्याकाळी 8 वाजण्याच्या सुमारास त्यांच्या घरात आढळून आले.

शंकर चंपाती यांचा दत्तवाडी चौकात नारळ पाणीचा व्यवसाय होता. तर त्यांच्या पत्नी गृहिणी होत्या. त्यांची मुलगी प्रियंका चंपाती ही खाजगी नोकरी करत आहे. रविवारी संध्याकाळी 8 वाजता प्रियंका बाहेरुन घरी आली तेव्हा चंपाती दाम्पत्याच्या हत्येचा प्रकार उघडकीस आला. घरातच दोघांचे मृतदेह रक्ताच्या थारोळ्यात आढळले.

चंपाती दाम्पत्याच्या डोक्यावर लोखंडी रॉडने हल्ला केल्याचं समोर आलं आहे. लूट, घरफोडीच्या उद्देशाने हे हत्याकांड झाल्याचा पोलिसांचा प्राथमिक अंदाज आहे. मात्र हत्येमागे आणखी काही कारण आहे का, याचा अधिक तपास पोलीस करत आहेत.