मुंबईतील भाजप नगरसेवकाला 24 लाखांचा भुर्दंड, बीएमसीच्या इतिहासात मोठी कारवाई

अंधेरीतील भाजप नगरसेवक मुरजी पटेल यांनी अखेरीस घडलेल्या घटनेची संपूर्ण जबाबदारी स्वीकारत आपला बिनशर्त माफीनामाही सादर केला तसेच यापुढे एकही बेकायदेशीर होर्डिंग लावणार नाही अशी लेखी हमीही हायकोर्टात दिली आहे.

मुंबई : मुंबई महानगरपालिकेच्या इतिहासातील एक मोठी घटना घडली आहे. आपल्याच वॉर्डात बेकायदेशीर होर्डिंग लावल्याबद्दल खुद्द नगरसेवकालाच 24 लाखांचा भुर्दंड पडला आहे. ही संपूर्ण रक्कम पालिका आयुक्तांना झालेल्या घटनेची नुकसानभरपाई म्हणून पालिकेच्या तिजोरीत येत्या दोन महिन्यांत जमा करावी लागणार आहे.

अंधेरीतील भाजप नगरसेवक मुरजी पटेल यांनी अखेरीस घडलेल्या घटनेची संपूर्ण जबाबदारी स्वीकारत आपला बिनशर्त माफीनामाही सादर केला तसेच यापुढे एकही बेकायदेशीर होर्डिंग लावणार नाही, अशी लेखी हमीही हायकोर्टात दिली आहे. कारवाईसाठी आलेल्या पालिका अधिकाऱ्यांना केलेली मारहाण या नगरसेवकाला खूप महागात पडली आहे.

इतकंच नव्हे तर आठवड्यातला एक दिवस आपल्याच वॉर्डात फिरून शाळा, मैदानं, हॉस्पिटल इत्यादी परिसरात फिरून बेकायदेशीर होर्डिंग शोधून त्याची रितसर तक्रारही पटेल यांनाच करावी लागणार आहे. त्यानंतर दोन महिन्यांनी पालिकेला केलेली नुकसानभरपाई आणि बेकायदेशीर होर्डिंगच्या किती तक्रारी केल्या याची माहितीही द्यावी लागणार आहे.

राज्यभरातील बेकायदेशीर होर्डिंगविरोधात सुस्वराज्य फाऊंडेशनतर्फे मुंबई उच्च न्यायालयात जनहित याचिका दाखल केली आहे. या याचिकेवर न्यायमूर्ती अभय ओक आणि न्यायमूर्ती संकलेचा यांच्या खंडपीठासमोर सुनावणी सुरू आहे. ज्यात मुरजी पटेल यांच्याबद्दलचं हे प्रकरण समोर येताच हायकोर्टानं त्यांना कोर्टाच्या आदेशांचा अवमान केल्याबद्दल नोटीस बजावली होती.

काय आहे प्रकरण

भाजपचे नगरसेवक मुरजी पटेल आणि केसरबेन मुरजी पटेल यांच्या जीवनज्योती फाऊंडेशनतर्फे अंधेरीतील पालिका मैदानाबाहेर व फुटपाथवर बेकायदा होर्डिंग आणि बॅनर लावल्याची तक्रार पालिकेच्या वेबसाईटमार्फत मिळाली होती. त्यानुसार, खातरजमा केल्यानंतर के वॉर्डातील लायसन्स इन्स्पेक्टर उत्तम सरवदे हे आपल्या सहकाऱ्यांसह कारवाईस गेले.

पालिका अधिकारी हे होर्डिंग्ज काढत असताना पटेल यांचे समर्थक आणि भाजपचे कार्यकर्ते राजू सरोज, सुनील चिले, रोशन शेख, नरेश शेलार, महेश शिंदे, प्रकाश मुसळे, विशाल निचिते यांनी त्यांना प्रचंड शिवीगाळ करत पालिका कर्मचाऱ्यांना मारहाणही केली’, असे महापालिकेने अवमान याचिकेद्वारे हायकोर्टाच्या निदर्शनास आणले. तसेच यासंदर्भातील फोटोही पुरावा म्हणून दाखल केले आहेत.