Mumbai University : मुंबई विद्यापीठास वर्ग-1 विद्यापीठाचा दर्जा बहाल, विविध शैक्षणिक संधी उपलब्ध होणार
UGC : विद्यापीठ अनुदान आयोगाकडून मुंबई विद्यापीठास वर्ग-1 ग्रेडेड ऑटोनॉमीचा दर्जा प्रदान करण्यात आला आहे. त्यामुळे विद्यार्थ्यांना विविध शैक्षणिक संधीचे नवीन दालन आता खुले होणार आहे.
मुंबई: देशातील अग्रगण्य विद्यापीठ म्हणून ओळखल्या जाणाऱ्या मुंबई विद्यापीठाच्या (Mumbai University) शिरपेचात आणखी एक मानाचा तुरा खोवला गेला आहे. विद्यापीठ अनुदान आयोगाकडून (UGC) मुंबई विद्यापीठास वर्ग-1 विद्यापीठाचा दर्जा बहाल करण्यात आला आहे. राज्यात सर्वाधिक नॅककडून (NACC) अ++ श्रेणी आणि 3.65 सीजीपीए गुणांकन असलेल्या मुंबई विद्यापीठास वर्ग-1 ग्रेडेड ऑटोनॉमीचा दर्जा बहाल करण्यात आल्यामुळे मुंबई विद्यापीठात विविध शैक्षणिक संधीचे नवीन दालन आता खुले होणार आहे.
विद्यापीठ अनुदान आयोगाकडून मुंबई विद्यापीठास वर्ग-1 विद्यापीठाचा दर्जा मिळाल्यामुळे विद्यापीठास आता युजीसीच्या परवानगी सुलभतेसह नवीन अभ्यासक्रम, नवीन विभाग, नवीन कँपसेस, नवीन ऑनलाईन अभ्यासक्रम, दूर व मुक्त अध्ययन संस्थेचे नवीन अभ्यासक्रम सुरु करता येतील.
तसेच आवश्यकतेनुसार स्थानिक, राष्ट्रीय आणि आंतरराष्ट्रीय गरजा ओळखून नाविन्यतेच्या क्षेत्रात पदवी आणि पदविका अभ्यासक्रमही विद्यापीठास सुरु करता येतील.
विद्यापीठास मिळालेल्या या वर्ग-1 च्या दर्जामुळे नॅशनल स्कील क्वालिफिकेशन फ्रेमवर्कच्या पार्श्वभूमीवर विद्यापीठास कौशल्याधारित अभ्यासक्रम सुरु करता येतील. वर्ग-1 विद्यापीठाच्या दर्जामुळे विद्यापीठास आता स्वयंअर्थसहाय्यित तत्वावर रिसर्च पार्क, इन्क्युबेशन सेंटर्स आणि युनिव्हर्सिटी सोसायटी लिंकेजेस् सेंटर्सची स्थापना करता येणार आहे. त्याचबरोबर अटी व शर्तीच्या अधीन राहून निश्चित कालावधीसाठी परदेशी शिक्षकांची नेमणूक करण्याचे आणि गुणवत्तेवर आधारीत परदेशी विद्यार्थ्यांचे प्रवेशाचे स्वातंत्र्य विद्यापीठास प्राप्त झाले आहे.
विशेष म्हणजे राष्ट्रीय शैक्षणिक धोरण अंमलबजावणीच्या पार्श्वभूमीवर शिक्षणाच्या आंतरराष्ट्रीयकरणासाठी परदेशी उच्च शिक्षण संस्थासोबत शैक्षणिक सामंजस्य करणे आता अधिक सुकर झाले आहे. याद्वारे दुहेरी पदवी, सह पदवी आणि ट्वीनिंग पदवी, विद्यार्थी शिक्षक आदान-प्रदान प्रक्रिया सुलभ होणार आहे.
ही बातमी वाचा:
महत्त्वाच्या बातम्या
ट्रेंडिंग न्यूज
