समृद्धी महामार्गाला बाळासाहेबांचं नाव देण्यास श्रीहरी अणेंचा विरोध
समृद्धी महामार्ग हे नाव वाईट आहे काय? असा सवाल श्रीहरी अणे यांनी विचारला आहे. शिवसेनेच्या एकाही नेत्याने विदर्भातील काहीही केलेलं नाही. या एका कारणासाठी तरी शिवसेनेच्या नेत्याचं नाव समृद्धी महामार्गाला नको, असं श्रीहरी अणे म्हणाले.
मुंबई : मुंबई-नागपूर समृद्धी महामार्गाच्या नामकरणावरुन शिवसेना-भाजपमध्ये सुरू असलेल्या वादात माजी महाधिवक्ता श्रीहरी अणे यांनी उडी घेतली आहे. श्रीहरी हरे यांनी समृद्धी महामार्गाला दिवंगत बाळासाहेब ठाकरे यांचं नाव देण्यास कडाडून विरोध केला आहे.
समृद्धी महामार्ग हे नाव वाईट आहे काय? असा सवाल श्रीहरी अणे यांनी विचारला आहे. शिवसेनेच्या एकाही नेत्याने विदर्भातील काहीही केलेलं नाही. या एका कारणासाठी तरी शिवसेनेच्या नेत्याचं नाव समृद्धी महामार्गाला नको, असं श्रीहरी अणे म्हणाले. श्रीहरी अणे यांनी फेसबूकवर पोस्ट लिहून शिवसेनेच्या मागणीला विरोध केला आहे.
शिवसेना नेत्यांची नावं मुंबई, पुण्यात शोभतील. हिम्मत असेल तर सदाशिव पेठेला 'ठाकरे पेठ' नाव द्यावं, असंही श्रीहरी अणे म्हणाले.
विदर्भातील महामार्गाचं नाव समृद्धी महामार्ग योग्य आहे. नाव बदलायचंच असेल तर 'विदर्भ' महामार्ग करा. व्यक्ती विशेष नावे हवी असतील तर विदर्भ कर्मभूमी असलेल्या महात्मा गांधी यांचं नाव समृद्धी महामार्गाला द्या, अशी मागणी श्रीहरी अणे यांनी केली.
समृद्धी महामार्गाला शिवसेनाप्रमुख बाळासाहेब ठाकरे यांचं नाव द्यायचं की माजी पंतप्रधान अटल बिहारी वाजपेयी यांचं, यावरुन भाजप-शिवसेना आमनेसामने आले आहेत. महामार्गाला बाळासाहेब ठाकरे यांचं नाव द्यावं यासाठी मंत्री एकनाथ शिंदे आणि शिवसेना आमदारांच्या शिष्टमंडळाने मुख्यमंत्र्यांची भेट घेत यासंदर्भात निवेदन दिलं.समृद्धी महामार्ग प्रकल्पाची अंमलबजावणी सार्वजनिक बांधकाम विभाग ( विशेष प्रकल्प ) करत असून या खात्याचे मंत्री एकनाथ शिंदे आहेत. त्यामुळे शिवसेनाप्रमुखांचं नाव देण्याबाबत शिंदे आग्रही आहेत.
दुसरीकडे, समृद्धी महामार्गाला अटल बिहारी वाजपेयी यांचं नाव देण्याच्या हालचाली भाजपकडून सुरु आहेत. त्यामुळे मुंबई आणि मुख्यमंत्र्यांच्या नागपूरला जोडणाऱ्या समृद्धी महामार्गाला कोणत्या पक्षाने सुचवलेलं नाव लागणार, हे पाहणं महत्त्वाचं आहे.
संबंधित बातम्या
महत्त्वाच्या बातम्या
