उल्हासनगरात शिवसैनिकांनी भाजप नगरसेवकाला मारहाण करत तोंडाला फासलं काळं, शिवसेनेविरोधात बोलत असल्याने हल्ला

राजेंद्र चौधरी यांच्या अनधिकृत बांधकामाविरोधात तक्रारी केल्यामुळे त्यांनी दडपशाही करण्यासाठी आपल्याला मारहाण केल्याचा आरोप मारहाण झालेल्या भाजपा नगरसेवक प्रदीप रामचंदानी यांनी केला आहे.

Pradeep Ramchandani

कल्याण : एकीकडे केंद्रीय मंत्री नारायण राणे यांच्या वक्तव्यानंतर राज्यभरात शिवसेनेकडून संतप्त प्रतिक्रिया उमटत असताना उल्हासनगरमध्ये शिवसेनेविरोधात बोलणाऱ्या भाजपा नगरसेवकाला शिवसैनिकांनी थेट काळं फासत मारहाण केल्याची घटना समोर आली आहे. या घटनेनंतर उल्हासनगर शहरात मोठी खळबळ उडाली आहे. प्रदीप रामचंदानी असं मारहाण झालेल्या भाजपा नगरसेवकाचं नाव आहे. 

प्रदीप रामचंदानी उल्हासनगर महानगरपालिकेचे स्वीकृत सदस्य आहेत. रामचंदानी हे आज दुपारच्या सुमारास उल्हासनगर महानगरपालिकेच्या बाहेर आले असता अचानक 8 ते 10 जणांनी त्यांच्यावर हल्ला करत त्यांना खाली पाडून मारहाण केली. त्यानंतर त्यांच्या तोंडाला काळं फासण्यात आलं. मारहाण करण्यासाठी आलेले कार्यकर्ते गळ्यात शिवसेनेची मफलर घालून आल्याचं या घटनेच्या व्हिडीओमध्ये पाहायला मिळत आहे. 

संपूर्ण प्रकारानंतर आपण शिवसेना शहर प्रमुख राजेंद्र चौधरी यांच्या अनधिकृत बांधकामाविरोधात तक्रारी केल्यामुळे त्यांनी दडपशाही करण्यासाठी आपल्याला मारहाण केल्याचा आरोप मारहाण झालेल्या भाजपा नगरसेवक प्रदीप रामचंदानी यांनी केला आहे. महाराष्ट्रात शिवसेनेचं तालिबानी राज्य असल्याची टीकाही रामचंदानी यांनी केली आहे. 

शिवसेना शहर प्रमुख राजेंद्र चौधरी यांना या घटनेबाबत विचारलं असता, त्यांनी प्रदीप रामचंदानी हे सातत्याने शिवसेना, मुख्यमंत्री उद्धव ठाकरे, तसेच शिवसेनेचे कार्यकर्ते यांच्या विरोधात बोलत असल्यामुळे शिवसैनिकांनी शिवसेना स्टाईलमध्ये त्यांना उत्तर दिलं आहे, असं राजेंद्र चौधरी यांनी सांगितलं. हा हल्ला शिवसैनिकांनीच केल्याचं सुद्धा त्यांनी मान्य केलं आहे. या घटनेमुळे उल्हासनगर शहरातील राजकीय वातावरण तापलं असून राणे यांच्या पिलावळीला धडा शिकवण्याचं काम शिवसैनिकांनी केल्याचं सुद्धा शिवसेना शहर प्रमुख राजेंद्र चौधरी यांनी म्हटलं आहे.