पंतप्रधान नरेंद्र मोदी आणि मुख्यमंत्री उद्धव ठाकरे उद्या एकाच मंचावर दिसणार

मुंबईतील राजभवन इथे उद्या (14 जून) पंतप्रधान मोदी यांच्या हस्ते क्रांतिकारी गॅलरीचं उद्घाटन होणार आहे. मुख्यमंत्री उद्धव ठाकरे यांचीही या कार्यक्रमाला उपस्थिती असेल.

PM Narendra Modi and CM Uddhav Thackeray

मुंबई : पंतप्रधान नरेंद्र मोदी (PM Narendra Modi) आणि मुख्यमंत्री उद्धव ठाकरे (CM Uddhav Thackeray) उद्या (14 जून) एकाच मंचावर दिसणार आहेत. मुंबईतील राजभवन इथे उद्या (14 जून) पंतप्रधान मोदी यांच्या हस्ते क्रांतिकारी गॅलरीचं उद्घाटन होणार आहे. मुख्यमंत्री उद्धव ठाकरे यांचीही या कार्यक्रमाला उपस्थिती असेल.

एप्रिल महिन्यात लता मंगेशकर फाऊंडेशन पुरस्कार घेण्यासाठी पंतप्रधान नरेंद्र मोदी मुंबई दौऱ्यावर आले होते. त्यावेळी कार्यक्रम पत्रिकेत मुख्यमंत्री उद्धव ठाकरे यांचं नाव नसल्यामुळे त्यांनी या कार्यक्रमाला जाणं टाळलं होतं. मात्र राजभवनात उद्या दुपारी चार वाजता क्रांतिकारी गॅलरीचं उद्घाटन होणार आहे. त्यासाठी पंतप्रधान मोदी मुंबई दौऱ्यावर येत आहेत. या कार्यक्रमात प्रमुख पाहुणे म्हणून मुख्यमंत्री देखील उपस्थित असणार आहेत. 

पंतप्रधान एक दिवसीय महाराष्ट्र दौऱ्यावर
पंतप्रधान नरेंद्र मोदी उद्या एक दिवसीय महाराष्ट्र दौऱ्यावर आहेत. त्यांचा पहिला कार्यक्रम पुण्यातील देहूमध्ये (Dehu) आहे. संत तुकाराम महाराज (Saint Tukaram Maharaj) यांच्या मूर्तीचं अन् शिळा मंदिराचं लोकार्पण पंतप्रधानांच्या हस्ते होणार आहे. त्यानंतर पंतप्रधान मुंबईत येणार आहेत. सी विद्यासागर राव राज्यपाल असताना राजभवनात एक भुयार सापडलं होतं, त्या भुयारात गॅलरी स्थापन करण्यात आली आहे. या गॅलरीमध्ये चाफेकर बंधू तसंच सावरकर बंधू यांची चित्रे आणि प्रदर्शन करण्यात येणार आहे. त्याचं उद्धाटन पंतप्रधानांच्या हस्ते होणार आहे. या कार्यक्रमाला मुख्यमंत्री उपस्थित राहणार की नाही याची चर्चा असताना मुख्यमंत्री कार्यालयाकडून उद्धव ठाकरे कार्यक्रमाला हजर राहणार असल्याचं स्पष्ट करण्यात आलं. त्यामुळे बऱ्याच दिवसांनंतर मुख्यमंत्री आणि पंतप्रधान एकत्र एका कार्यक्रमात दिसतील.

यापूर्वी मुख्यमंत्री आणि पंतप्रधानांची भेट कधी?
याआधी लता मंगेशकर फाऊंडेशनचा पुरस्कार पंतप्रधान मोदी यांना देण्यात आता होता. तेव्हा कार्यक्रम पत्रिकेत नाव नसल्यामुळे मुख्यमंत्र्यांनी त्या कार्यक्रमाला जाणं टाळलं होतं. त्याउलट मुख्यमंत्री एका आजीबाईंची भेट घेण्यासाठी गेले होते, ज्या मातोश्री या निवासस्थानी आंदोलनाला आल्या होत्या. तेव्हा पंतप्रधान आणि मुख्यमंत्री यांच्या दुरावा असल्याची चर्चाही रंगली होती. त्याआधी मुख्यमंत्री आणि पंतप्रधान यांची भेट लता मंगेशकर यांचं निधन झालं होतं तेव्हा झाली होती. ही भेट सार्वजनिकरित्या आणि सगळ्यांसमोर झाली होती. तर त्याआधी दिल्लीमध्ये या दोघांची भेट झाली होती. पंतप्रधान कार्यालयात झालेल्या या 40 मिनिटांच्या भेटीनंतर हे दोघेही फारसे प्रत्यक्षात भेटलेले नाहीत. व्हिडीओ कॉन्फरन्सिंगच्या माध्यमातून एखाद दुसऱ्या बैठकीला मुख्यमंत्र्यांची उपस्थिती राहिलेली होती.