होय आम्ही कुत्रे आहोत : हितेंद्र ठाकूर

शिवसेना आणि भाजप यांनी कुत्रे-मांजर संबोधल्यानंतर हितेंद्र ठाकूर यांनी प्रत्युत्तर दिलं आहे.

विरार : पालघरच्या लोकसभा पोटनिवडणुकांच्या रणसंग्रामाकडे संपूर्ण महाराष्ट्राचं लक्ष लागून राहिलं आहे. भाजप आणि शिवसेनेने ही निवडणूक अत्यंत प्रतिष्ठेची केली आहे. शिवसेना आणि भाजप यांनी कुत्रे-मांजर संबोधल्यानंतर हितेंद्र ठाकूर यांनी प्रत्युत्तर दिलं आहे. सध्या पालघरमध्ये पातळी सोडून प्रचार सुरु आहे. होय आम्ही कुत्रे आहोत. तीस वर्षांपासून वफादार कुत्र्यासारखं लोकांबरोबर, मतदारांबरोबर आम्ही इमानदार आहोत. असंही हितेंद्र ठाकूर यांनी दरडावून सांगितलं. कोणत्याही परिस्थितीत ही निवडणूक जिंकण्याच्या इराद्याने शिवसेना आणि भाजपची वरिष्ठ नेते मंडळी पालघरमध्ये ठाण मांडून आहेत. सर्व पक्ष वसई-विरारमध्ये आमदार हितेंद्र ठाकूर यांना टार्गेट करताना दिसत आहे. मुख्यमंत्री देवेंद्र फडणवीस आणि शिवसेना पक्षप्रमुख उद्धव ठाकरे यांनी आपल्या भाषणात हितेंद्र ठाकूरांना कुत्रा-मांजर संबोधून टीका केली होती. त्यावर ठाकूरांनी उत्तर दिलं. पालघर पोटनिवडणुकीत सर्वच पक्षांना शिवसेना-भाजपपेक्षा 'शिटी'ची सीट आल्याचं चालेल. शिवसेनेला भाजपची सीट आलेली चालणार नाही आणि भाजपला शिवसेनेची सीट आलेली चालणार नाही. त्यामुळे सर्व पक्षाचे कार्यकर्ते, नेते आमच्या पक्षाच्या उमेदवाराला मदत करणार असल्याचा दावाही ठाकूरांनी केला.

इलाका तो कुत्तों का होता है, शेर का नाही, मुख्यमंत्र्यांचा ठाकूरांवर हल्ला

उद्धव आणि आपल्यात झालेली भेट ही केवळ योगायोग असल्याचं हितेंद्र ठाकूर यांनी सांगितलं. यावेळी आपली सीट येणारच असं उद्धव यांना सांगून, निवडणुकीत मदत मागितल्याची कबुलीही त्यांनी दिली. मात्र उद्धव ठाकरेंनी आम्ही शिटी घेतो, तुम्ही भगवा खांद्यावर घ्या, अशी मिश्कीली जोडल्याचंही ठाकूरांनी सांगितलं. पालघर पोटनिवडणुकीत स्टार प्रचार हे आमचे कार्यकर्ते असून, त्यांच्या जोरावर ही निवडणूक आम्ही लढवत असल्याचं ठाकूरांनी सांगितलं. बाहेरुन आलेले नेते हे केवळ 28 मेपर्यंत असतील, मात्र आम्ही नागरिकांसाठी 365 दिवस असणार आहोत, अशी पुस्तीही त्यांनी जोडली. गेल्या निवडणुकीचं चित्र बघितल्यावर मोदींच्या लाटेतही आम्ही पाच विधानसभेच्या एकूण मतदानात 'नंबर वन' वर होतो. त्यामुळे आताही 'नंबर वन' वर आहोत आणि आमची सीट निवडून येणार, असा आशावादही यावेळी त्यांनी व्यक्त केला.