नववर्षाच्या स्वागतासाठी तयारी करताय?, BMC चे नियम एकदा वाचाच

Mumbai New Year Celebration Rules : ख्रिसमस, वर्षअखेर अथवा नवीन वर्षाच्या स्वागतासाठी तुम्ही प्लॅन करत असाल तर प्रशासनाच्या सुचनांकडे तुम्ही लक्ष द्या!  

BMC

Mumbai New Year Celebration Rules : ख्रिसमस, वर्षअखेर अथवा नवीन वर्षाच्या स्वागतासाठी तुम्ही प्लॅन करत असाल तर प्रशासनाच्या सुचनांकडे तुम्ही लक्ष द्या!  कारण, गर्दीच्या पार्श्वभूमी प्रशासनाकडून मुंबईत विशेष दक्षता बाळगली जाणार आहे. तुम्ही मोकळ्या जागी पार्टी करणार असाल तर 25 टक्के पेक्षा जास्त लोकांना एकत्र येता येणार नाहीये...आणि जर तुम्ही घरातच मित्रमंडळींना बोलवून 31 डिसेंबर सिलिब्रेशन करणार असाल तर घराच्या एकूण क्षमतेपेक्षा 50 टक्के क्षमतेने पाहुण्यांना तुम्हाला बोलायचं आहे. मुंबई महानगर पालिकेकडून  सिलिब्रेशनबाबत आखून दिलेल्या आणि पाहुण्यांना पार्टीला बोलावण्यासंदर्भात नियम ठरवले आहेत. गर्दी टाळा, कोविड प्रतिबंधात्मक नियम पाळा, अन्यथा सक्त कारवाई करण्यात येईल असं बृहन्मुंबई महानगरपालिका आयुक्त डॉ. चहल यांनी मुंबईकरांना आवाहन केलं आहे. 
 
बीएमसीकडून कोणत्या सूचना आणि नियम सांगण्यात आलेत?
1) लग्न व इतर समारंभांमध्ये उपस्थितीची मर्यादा काटेकोरपणे पाळावी. 
2) बंदिस्त जागेत क्षमतेच्या 50 टक्केच उपस्थिती.
3) खुल्या जागेत क्षमतेच्या 25 टक्केच उपस्थितीला परवानगी, मात्र एक हजारांपेक्षा अधिक उपस्थिती नियोजित असेल तर स्थानिक आपत्ती व्यवस्थापन प्राधिकरणाची पूर्व परवानगी आवश्यक आहे. 
4) हॉटेल्स, उपहारगृह, सिनेमागृह, मॉल्स आदी ठिकाणी नियमांचे योग्य पालन करावे
5) नाताळ, नववर्ष स्वागताचे समारंभ आयोजन टाळावे
6 )मास्कचा वापर करावा, कोविड लसीकरण पूर्ण करुन घ्यावे

कोरोना ओमायक्रॉन हा नवीन प्रकार जगभरात वेगाने फैलावत आहे. त्यामुळे आरोग्य यंत्रणेवर मोठा ताण निर्माण होऊ लागला आहे. कोविडची तिसरी लाट येऊ नये, म्हणून शासन आणि प्रशासन वारंवार आवाहन करित असतानाही त्याचे बहुतांश ठिकाणी योग्यरित्या पालन केले जात नाही.  विशेषतः लग्न समारंभ आणि इतर समारंभांमध्ये नियम मोडले जात असल्याचे आढळते आहे. त्यामुळे सर्व नागरिकांनी शासनाने आखून दिलेल्या मर्यादांचे योग्य पालन करावे, कोणत्याही प्रकारची गर्दी टाळावी, मास्क लावण्यासह कोविड प्रतिबंधात्मक नियमांचे पालन करावे, प्रत्येकाने लसीकरण पूर्ण करुन घ्यावे, असे नम्र आवाहन महानगरपालिका आयुक्त डॉ. इकबाल सिंह चहल यांनी जनतेला केले आहे. 
 
सार्वजनिक ठिकाणी कोरोनाचे नियम गांभीर्याने पाळले जात नसल्याची बाब प्रशासनाच्या निदर्शनास आली आहे. या पार्श्वभूमीवर पुढील ठळक बाबींचे पालन कटाक्षाने करण्यात यावेत.
1) बंदिस्त सभागृहांमध्ये आयोजित होणारे कोणतेही कार्यक्रम / समारंभ / उपक्रम या ठिकाणी, त्या सभागृहाच्या एकूण क्षमतेच्या ५० टक्के व्यक्तिंनाच उपस्थितीची परवानगी आहे.
2) मोकळ्या / खुल्या जागेत होणाऱया कार्यक्रम / समारंभ / उपक्रम यासाठी सदर जागेच्या क्षमतेच्या २५ टक्के एवढ्याच संख्येने उपस्थितीला परवानगी असेल. 
3) मात्र, खुल्या / मोकळ्या जागेतील कोणत्याही आयोजनात एक हजारापेक्षा अधिक व्यक्ती एकत्र येणार असतील तर, त्या संदर्भात स्थानिक आपत्ती व्यवस्थापन प्राधिकरणाला आगावू सूचना देऊन त्याबाबतची पूर्व मंजुरी प्राप्त करणे अत्यावश्यक आहे.
4) सर्व हॉटेल्स्, उपहारगृह, सिनेमागृह, इतर सर्व शासकीय व खासगी आस्थापना आदी सर्व ठिकाणी उपस्थितींच्या नियमांसह कोविड प्रतिबंधात्मक निर्देशांचे सक्तीने पालन करण्यात यावे. 
5) सर्व पात्र नागरिकांनी कोविड लसीचे दोन्ही डोस घेऊन आपले लसीकरण पूर्ण करणे आवश्यक आहे. सार्वजनिक वाहतूक व्यवस्थेसह इतर सार्वजनिक ठिकाणी देखील कोविड लसीकरण पूर्ण झालेल्यांनाच योग्य ती मुभा असेल. अन्यथा नियमानुसार कारवाई केली जाईल.  
6) सार्वजनिक ठिकाणी / आस्थापनांमध्ये कार्यरत सर्व मनुष्यबळाचे तसेच कार्यक्रम / समारंभांमध्ये सर्व उपस्थितांचे लसीकरण पूर्ण झालेले असणे आवश्यक आहे. त्याचे उल्‍लंघन केल्याचे आढळले तर संबंधित आस्थापनांवर नियमानुसार योग्य ती दंडात्मक कारवाई केली जाईल.  
7) मास्कचा योग्यरितीने वापर करणे, हातांची नियमित स्वच्छता राखणे आणि सुरक्षित अंतर राखणे, सर्व परिसर / खोल्या / प्रसाधनगृहे यांची वेळोवेळी स्वच्छता आणि निर्जंतुकीकरण करणे यासह कोविड प्रतिबंधक सर्व बाबींचे प्रत्येक नागरिकाकडून काटेकोर पालन करण्यात यावे. 
8)नाताळ (ख्रिसमस), नवीन वर्ष स्वागतासाठी पार्ट्यांचे आयोजन करणे टाळावे, समारंभांमध्ये गर्दी करु नये, कोविड प्रतिबंधात्मक वर्तन राखावे.