Mumbai Metro : मुंबई मेट्रोचा प्रवास आता अधिक सुखकर आणि सवलतीच्या दरात होणार आहे. महामुंबई मेट्रो संचलन महामंडळाने (MMMOCL) 'मुंबई 1' कार्डचा वापर करून मुंबई मेट्रोने प्रवास करणाऱ्या प्रवाशांसाठी विशेष सवलत देण्याचा निर्णय घेतला आहे. मुंबई मेट्रोच्या माध्यमातून मुंबईतील विविध ठिकाणी भेट देणाऱ्या मेट्रो प्रवाशांसाठी 'अमर्याद ट्रीप पास' (Unlimited trip pass) ही  विशेष सुविधा उपलब्ध करून देण्यात आली आहे. त्यानुसार एक दिवसीय अमर्याद ट्रीप पासचे शुल्क हे रुपये 80, तर तीन दिवसांच्या अमर्याद ट्रीप पासचे शुल्क हे रुपये 200 इतके असेल. 


त्यासोबतच 30 दिवसांच्या कालावधीत 45 वेळा मेट्रोने प्रवास करणाऱ्या प्रवाशांसाठी 15 टक्के सूट तर 60 वेळा प्रवास करणाऱ्या प्रवाशांसाठी 20 टक्के सूट मिळणार आहे. सदर सवलतीची वैधता ही 30 दिवसांच्या कालावधीसाठी मर्यादित असून त्याचं शुल्क मुंबई 1 कार्डच्या माध्यमातून प्रीपेड स्वरूपात आकारलं जाईल. 


Mumbai Metro 1: मुंबई 1 कार्ड ची उपलब्धता


मुंबई मेट्रोचे प्रवासी त्यांचे 'मुंबई 1' हे नॅशनल कॉमन मोबिलिटी कार्ड मुंबई मेट्रोच्या तिकीट काऊंटर आणि कस्टमर केअर काउंटरवर अल्प कागदपत्रांसह सहज मिळवू तसेच रिचार्ज करू शकतात. या कार्डचा वापर रिटेल स्टोअरमध्ये आणि बेस्ट बस प्रवासादरम्यान देखील वापरले जाऊ शकते.


मुंबईकर मेट्रो प्रवाशांसाठी अत्यंत फायदेशीर आणि उपयुक्त असणाऱ्या या सुविधांची घोषणा करताना एमएमआरडीएचे महानगर आयुक्त आणि महा मुंबई मेट्रो संचलन मंडळाचे अध्यक्ष तथा मुख्य व्यवस्थापकीय संचालक एस. व्ही. आर. श्रीनिवास म्हणाले की, मुंबई मेट्रो या पर्यावरण पूरक वाहतूक व्यवस्थेचा वापर वाढून प्रदूषण कमी करण्याच्या दृष्टीने प्रयत्नशील आहोत. मुंबईकरांचा दैनंदीन मेट्रो प्रवास हा अधिकाधिक सुखकर व्हावा या हेतूने आम्ही सातत्याने नवनवीन पर्यायांचा विचार आणि अमलबजावणी करीत आहोत. मुंबई -1 कार्डच्या माध्यमातून सध्या सोमवार ते शनिवार 5 टक्के , रविवारी आणि राष्ट्रीय सुट्टीच्या दिवशी 10 टक्के सवलत उपलब्ध आहे. मुंबई मेट्रो प्रवाशांसाठी उपलब्ध करण्यात आलेल्या या नवीन ट्रीप पास योजनेमुळे तिकीट प्रक्रिया ही अधिक सुलभ होऊन प्रवाशांच्या वेळेची आणि पैशांची बचत होईल. त्यासोबतच या योजनेमुळे मुंबई मेट्रो प्रवासादरम्यान जास्तीतजास्त प्रवाशांना मुंबई-1 हे नॅशनल कॉमन मोबिलिटी कार्ड वापरण्यासाठी प्रोत्साहन मिळेल.


या सुविधेबाबतची वैशिष्टे आणि सूचना


• 45 आणि 60 ट्रीप पास हा खरेदीच्या तारखेपासून 30 दिवसांसाठी वैध राहील.


• अनलिमिटेड ट्रीप पास – 80 रुपये ( वैधता 1 दिवस ), 200 रुपये ( वैधता 3 दिवस )


• 1 ट्रीप – एकेरी प्रवास


• पास नुसार मुंबई मेट्रोने प्रवास हा केवळ पास मध्ये निश्चित केलेल्या गंतव्य स्थानकांदरम्यानच्या प्रवासासाठी मर्यादित असतील. 


• मुंबई 1 कार्ड हरवल्यास कर्डमधील शिल्लक रक्कम ही परत मिळवता येणार नाही.


• मुंबई 1 कार्ड खराब झाल्यास, काम करत नसल्यास अथवा हरवल्यास नवीन कार्डासाठी रुपये 100 इतके शुल्क आकारले जातील.


• ट्रीप पासेस फक्त मुंबई 1 नॅशनल कॉमन मोबिलिटी कार्डसाठी वैध आहेत