मध्य आणि हार्बर मार्गावर शेवटची लोकल आज लवकर सुटणार!

शनिवारी रात्री विशेष ब्लॉक घेतला जाणार आहे. शनिवार रात्री हार्बरच्या दोन्ही मार्गांवर आणि मध्य रेल्वेच्या अप-जलद मार्गावर रात्री 11.30 ते रविवारी पहाटे 5.30 या काळात मेगाब्लॉक घेण्यात येणार आहे.

प्रातिनिधिक फोटो

मुंबई : मध्य रेल्वेवरील कुर्ला ते सायन स्थानकांमध्ये असलेला पादचारी पूल तोडण्यात येणार आहे. त्यासाठी शनिवारी रात्री विशेष ब्लॉक घेतला जाणार आहे. शनिवार रात्री हार्बरच्या दोन्ही मार्गांवर आणि मध्य रेल्वेच्या अप-जलद मार्गावर रात्री 11.30 ते रविवारी पहाटे 5.30 या काळात मेगाब्लॉक घेण्यात येणार आहे. मध्य रेल्वेच्या डाऊन जलद आणि अप-डाऊन धीम्या मार्गावर रात्री 1.30 ते पहाटे 3.30 वाजेपर्यंत ब्लॉक असेल. या कालावधीत हार्बर, मध्य रेल्वेवरील लोकल, मेल/एक्स्प्रेसच्या वेळापत्रकात मोठे बदल करण्यात आले आहेत. त्यामुळे या दिवशी प्रवाशांची मोठ्या प्रमाणात प्रवाशांची गैरसोय होणार आहे. हार्बर मार्गावरील वडाळा ते मानखुर्द स्थानकांमध्ये दोन्ही मार्गांवरील वाहतूक पूर्णत: बंद राहील. डाऊन हार्बरवर शनिवारी रात्री 10.58 ते रात्री 12.40 आणि पहाटे 4.32 ते 5.56 वाजेपर्यंत, अप हार्बरवर शनिवारी रात्री 9.59 ते रात्री 12.03 आणि पहाटे 3.51 ते 5.15 वाजेपर्यंत वाहतूक बंद असेल. या कालावधीत पनवेल ते मानखुर्दमध्ये विशेष गाड्या चालवल्या जातील. तसेच हार्बर मार्गावरील प्रवासी ट्रान्स हार्बर मार्गावरून ठाणे ते वाशी, नेरूळपर्यंत प्रवास करू शकतात. मेल-एक्स्प्रेसवरही परिणाम रविवारी पुणे-सीएसएमटी-पुणे सिंहगड एक्स्प्रेस, मनमाड-सीएसएमटी- मनमाड राज्यराणी एक्स्प्रेस, पुणे-सीएसएमटी-पुणे डेक्कन क्वीन ए, मनमाड-सीएसएमटी-मनमाड पंचवटी एक्स्प्रेस, मनमाड-एलटीटी-मनमाड गोदावरी एक्स्प्रेस या गाड्या रद्द केल्या आहेत. अमृतसर-सीएसएमटी मुंबई एक्स्प्रेस, साईनगर शिर्डी-सीएसएमटी मुंबई फास्ट पॅसेंजर, कन्याकुमारी-सीएसएमटी जयंती-जनती एक्स्प्रेस, हावडा-सीएसएमटी मुंबई मेल, गोंदिया-सीएसएमटी विदर्भ एक्स्प्रेस गाड्या दादरपर्यंतच चालवल्या जातील. रविवारी सीएसएमटी-मडगाव मांडवी एक्स्प्रेस सकाळी 9.05 वाजता आणि सीएसएमटी-केएसआर बेंगळुरू उद्यान एक्स्प्रेस सकाळी 10.10 वाजता सुटणार आहे. याशिवाय रविवारी मुंबईत येणाऱ्या मेल-एक्सप्रेस गाड्या उशिराने धावणार आहेत. त्यामुळे प्रवाशांनी गाड्यांच्या वेळेची खात्री करुनच बाहेर पडण्याची गरज आहे.