नुतनीकरणावेळी बांधलेल्या मंत्रालयाबाहेरच्या पायऱ्या तोडणार!

मुंबईच्या प्रसिद्ध अशा एशियाटिक लायब्ररीच्या पायऱ्यांसारख्याच पायऱ्या मंत्रालयाच्या नव्या बिल्डिंगबाहेर दिखाव्यापोटी बनवण्यात आल्या होत्या.

फोटो : वैभव परब

मुंबई : मंत्रालयाचा 2014 साली मेकओव्हर करताना बनवण्यात आलेल्या पायऱ्या आता तोडण्यात येणार आहेत. मुंबईच्या प्रसिद्ध अशा एशियाटिक लायब्ररीच्या पायऱ्यांसारख्याच पायऱ्या मंत्रालयाच्या नव्या बिल्डिंगबाहेर दिखाव्यापोटी बनवण्यात आल्या होत्या. ‘मुंबई मिरर’च्या वृत्तानुसार, या पायऱ्या मुंबई पोलीस दलाला सुरक्षेच्या दृष्टीने आणि अग्निशमन दलाला त्यांच्या ऑपरेशन्सच्या दृष्टीने अडथळा ठरत आहेत. शिवाय मुंबई हेरिटेज कॉन्झर्वेशन कमिटीनेही पोलीस आणि अग्निशमन दलाची मागणी योग्य असल्याचं म्हटल्यामुळे पायऱ्या तोडण्यात येणार असल्याचं या वृत्तात म्हटलं आहे. मंत्रालयाला 2012 साली लागलेल्या आगीनंतर नव्या इमारतीचं बांधकाम करण्यात आलं. त्यासाठी जनतेच्या कररुपी मिळणाऱ्या पैशातून तब्बल 200 कोटी रुपये खर्च झाले. पण एवढा मोठा खर्च करुन बांधलेल्या पायऱ्या पोलिसांच्या सुरक्षेला धोका ठरत आहेत. अशा घटनांच्या प्रसंगी कार्य करताना अग्निशमन दलालाही अडथळा ठरणार आहे. पुरातत्व विभागानेही मंत्रालयाबाहेरील या देखण्या पायऱ्यांचा काही उपयोगच नसल्याचं म्हटलंय. त्यामुळे या पायऱ्या पाडण्यासाठी सार्वजनिक बांधकाम विभागानेही हिरवा कंदील दिलाय.