शिक्षणसम्राट शिवाजीराव जोंधळे यांना मुलानेच गंडवलं!

शिवाजीराव जोंधळे यांची 'समर्थ समाज संस्था' ही शैक्षणिक संस्था असून यात त्यांचा मुलगा सागर जोंधळे, पत्नी वैशाली जोंधळे हे पदाधिकारी आहेत.

कल्याण : शिक्षणसम्राट अशी ओळख असलेल्या शिवाजीराव जोंधळे यांना त्यांच्या मुलानेच चुना लावल्याचा प्रकार समोर आला आहे. याप्रकरणी सीआयडीने तपास करुन गुन्हा दाखल केला आहे. नुकतंच कल्याण कोर्टात या प्रकरणी आरोपपत्र दाखल करण्यात आलं आहे.

 

शिवाजीराव जोंधळे यांची 'समर्थ समाज संस्था' ही शैक्षणिक संस्था असून यात त्यांचा मुलगा सागर जोंधळे, पत्नी वैशाली जोंधळे हे पदाधिकारी आहेत. या दोघांसह संस्थेच्या इतर विश्वस्तांनी संगनमत करुन संस्थेचं बनावट मिनिट बुक तयार केलं आणि संगनमताने 41 लाख 81 हजार रुपयांचा आर्थिक घोटाळा केला. या पैशातून सागर जोंधळे याने स्पीडबोट विकत घेतली. इतकंच नव्हे, तर अध्यक्ष असलेल्या शिवाजीराव जोंधळे यांनाही बाजूला करण्याचा प्रयत्न करण्यात आल्याचा आरोप स्वतः शिवाजीराव जोंधळे यांनी केला आहे.

याबाबत जोंधळे यांनी तक्रार केल्यानंतर सीआयडीकडे या प्रकरणाचा तपास सोपवण्यात आला होता. याप्रकरणी सीआयडीने तपास करत सागर जोंधळे, वैशाली जोंधळे यांच्यासह एकूण सहा जणांविरोधात गुन्हा दाखल केला. तसंच कल्याण कोर्टात या प्रकरणी आरोपपत्र दाखल करण्यात आलं. आपली फसवणूक करणाऱ्यांवर न्यायालयाने कडक कारवाई करावी, अशी मागणी शिवाजीराव जोंधळे यांनी केली आहे.