मुंबई : शीना बोरा हत्याकांडातील (Sheena Bora Murder Case) मुख्य आरोपी इंद्राणी मुखर्जीला (Indrani Mukerjea) दिलासा मिळाला आहे. इंद्राणी मुखर्जीला परदेशात जाण्यास मुंबई सत्र न्यायालयाने सशर्त परवानगी दिली आहे. जामिनावर बाहेर पडल्यानंतर इंद्राणीला पहिल्यांदाच देशाबाहेर जाण्यास परवानगी देण्यात आली आहे. पुढील तीन महिन्यांत एकदाच 10 दिवसांकरता स्पेन आणि इंग्लंडमध्ये जाण्यास परवानगी देण्यात आली असून त्यासाठी दोन लाख रूपये अनामत रक्कम तसेच दोन नातेवाईकांना हमीदार बनवण्याचे निर्देश सत्र न्यायालयाने दिले आहेत.
परदेशात इंद्राणी मुखर्जी जिथं राहणार आहे तिथला संपूर्ण पत्ता आणि लँडलाईन नंबर सीबीआयला देणं बंधनकारक आहे. याशिवाय परदेशातील वास्तव्यादरम्यान तिथल्या भारतीय दूतावासात एकदा हजेरी लावणं बंधनकारक आहे. ती हजेरी लावल्याचं प्रमाणपत्र भारतात परत आल्यावर कोर्टात सादर करावं लागणार.
याशिवाय परदेशात असताना कोणतंही गैरकृत्य अथवा इतक कोणत्याही विवादात अडकून देशाचं नाव खराब होईल असं काम न करण्याची सक्त ताकीद मुंबई सत्र न्यायालयाने दिली आहे. इंद्राणी परदेशात असताना तिचे वकील या नात्यानं रणजित सांगळे यांना मुंबईत गरज पडल्यास उपलब्ध राहण्याचे निर्देश देण्यात आले आहेत.
काय आहे शीना बोरा हत्या प्रकरण?
शीना बोरा (वय 24) हिची एप्रिल 2012 साली हत्या करण्यात आली होती. हे प्रकरण 2015 साली उजेडात आले होते. पोलिसांच्या माहितीनुसार, शीनाची आई इंद्राजी मुखर्जी या हत्याप्रकरणातील मुख्य आरोपी आहे. अनेक महिने ते तुरुंगात होती. मात्र, सध्या इंद्राणी मुखर्जीला जामिनावर बाहेर सोडण्यात आले आहे.
इंद्राणीचा चालक शामवर रायला बेकायदेशीर हत्यार बाळगल्याप्रकरणी अटक करण्यात आली आहे. त्याने दिलेल्या धक्कादायक माहितीच्या आधारे इंद्राणी मुखर्जीला साल 2015 मध्ये अटक करण्यात आली. इंद्राणीचा पूर्वाश्रमीचा पती संजीव खन्ना आणि शामवर राय यांनी मिळून पहिल्या पतीपासूनची मुलगी शीनाची हत्या केली आणि त्यांच्याच मदतीनं 25 एप्रिल 2012 रोजी तिच्या मृतदेहाची विल्टेवाट लावण्यात आल्याचा आरोप आहे. 2015 मध्ये अखेर हे प्रकरण उघडकीस आले होते.
इंद्राणीने मुंबईतील वांद्रे येथे शीनाची गळा दाबून हत्या केल्यानंतर मृतदेहाची विल्हेवाट लावण्यासाठी रायगड जिल्ह्यातील पेण परिसरातील गागोदे गाव गाठल्याचं सांगण्यात येतंय. या गावाच्या परिसरात शीनाचा मृतदेह फेकून देण्यात आला होता. हे प्रकरण उजेडात आल्यानंतर पोलिसांनी इंद्राणीसोबत तिचा पूर्वाश्रमीचा पती संजीव खन्नालाही हत्या आणि पुरावे नष्ट केल्याच्या आरोपाखाली अटक केली होती. सीबीआयने कटात सहभागी असल्याने पीटर मुखर्जीलाही अटक केली होती. 2020 मध्ये त्याला जामीन देण्यात आला. खटला सुरु असतानाच पीटर मुखर्जी आणि इंद्राणीचा घटस्फोट झाला होता.
ही बातमी वाचा: