दारु न मिळाल्याने विमानात धिंगाणा घालणाऱ्या महिलेला अटक

एअर इंडियाच्या विमानाने गोंधळ घालणारी आयरिश महिला मुंबईहून लंडनला प्रवास करत होती. विमानात बसताच आधीच दारु प्यायलेल्या या महिलेने विमानातील क्रू मेंबर्सकडे दारूची मागणी केली.

मुंबई : एअर इंडियाच्या विमानात दारु पिऊन धिंगाणा घालणाऱ्या महिलेला अटक करण्यात आलेली आहे. मुंबईहून लंडनला जाणाऱ्या विमानात हा सगळा प्रकार घडला आहे. दारुच्या नशेत महिलेने विमानातील क्रू मेंबर्सशी वाद घातला. या वादादरम्यान गोंधळ घालणाऱ्या महिलेने क्रू मेंबर्सला शिवीगाळ आणि मारहाणही केली.

एअर इंडियाच्या विमानात गोंधळ घालणारी आयरिश महिला मुंबईहून लंडनला प्रवास करत होती. विमानात बसताच आधीच दारु प्यायलेल्या या महिलेने विमानातील क्रू मेंबर्सकडे आणखी दारूची मागणी केली. मात्र क्रू मेंबर्सने महिलेला दारु देण्यास साफ नकार दिला. त्यानंतर चिडलेल्या महिलेने क्रू मेंबर्सना शिवीगाळ करण्यास सुरूवात केली. दरम्यान एका क्रू मेंबरच्या तिने थोबाडीतही मारली.

या संपूर्ण प्रकारामुळे विमानात काही वेळ तणावाचं वातावरण निर्माण झालं होतं. क्रू मेंबरशी गैरवर्तन करणाऱ्या महिलेला लंडनच्या हीथ्रो विमानतळावर अटक करण्यात आली आहे.

एअर इंडियाच्या एआय- 131 विमानातील ही घटना आहे. या संपूर्ण घटनेचा व्हिडीओ एका क्रू मेंबरने शूट केला आहे. गोंधळ घालणारी महिला सीट नंबर '1-जे'वर बसली होती. रेड वाईन प्यायल्यानंतर ही महिला इकोनॉमी क्लासच्या वॉशरुममध्ये गेली. त्याठिकाणी तिने सिगरेट ओढलं, मात्र सुदैवाने स्मोक अलार्म वाजला नाही.