बेस्टच्या दर कपातीचा निर्णय लांबणीवर, स्वस्त प्रवासासाठी मुंबईकरांना वाट पाहावी लागणार

बेस्ट समितीच्या बैठकीत बेस्ट दर कपातीच्या प्रस्तावाचा निर्णय तूर्तास पुढे ढकलण्यात आला आहे. यामुळे मुंबईकरांना स्वस्त बेस्ट बस प्रवासासाठी आणखी काही दिवस प्रतीक्षा करावी लागणार आहे.

Getty Images)

मुंबई : बेस्ट समितीच्या बैठकीत बेस्ट दर कपातीच्या प्रस्तावाचा निर्णय तूर्तास पुढे ढकलण्यात आला आहे. यामुळे मुंबईकरांना स्वस्त बेस्ट बस प्रवासासाठी आणखी काही दिवस प्रतीक्षा करावी लागणार आहे. आज बेस्ट समितीच्या बैठकीत बेस्ट दर कमी करण्यासाठी प्रस्ताव मांडण्यात आला. परंतु घाईघाईत प्रस्ताव सादर न करता सविस्तर प्रस्ताव बेस्ट समितीत मांडण्यात यावा, अशी मागणी बेस्ट समिती सदस्य सुनिल गणाचार्य यांनी केली. याला सर्व सदस्यांनी पाठिंबा जाहीर केला. त्यानंतर हा प्रस्ताव मंजुरीसाठी पुढील बैठकीत राखून ठेवण्यात आला. बेस्ट कामगार युनियनने सामंजस्य करार केल्यानंतर बेस्ट कामगारांचा प्रश्न सुटला. मात्र मुंबईकरांचा सुलभ व कमी दरातील प्रवासाचा प्रश्न बारगळला. बेस्ट कमी दरात सेवा देत आहे, त्याचे स्वागत केले आहे. मात्र त्यात काही त्रुटी होत्या. या त्रुटींबाबत आज बेस्ट समितीच्या बैठकीत स्पष्टीकरण मागितले आहे. 3 महिन्यात किती बस येतील, त्या डेपोत कधी कार्यरत होतील. याबाबत सविस्तर माहितीसह बेस्ट समितीत प्रस्ताव आणावा, त्यानंतर त्याला आम्ही मंजुरी देऊ, असे बेस्ट समितीचे अध्यक्ष अनिल पाटणकर यांनी सांगितले. बेस्ट दर कपातीच्या प्रस्तावाला आमचा विरोध नाही. परंतु बेस्टकडे बसेसची संख्या अपुरी आहे. त्यामुळे बेस्ट दर कमी करण्यापूर्वी नव्या बेस्ट बस ताफ्यात आणाव्यात. तसेच बेस्टकडून ज्या 1200 नव्या चालकांची भरती केली जाणार आहे, त्यांना बेस्टच्या नियमांचे प्रशिक्षण द्यावे. त्यानंतर त्यांना सेवेत आणावे, अशी मागणी मांडण्यात आली आहे. तसेच या बस कोणत्या डेपोतून कशा पद्धतीने सोडणार याची माहिती देऊन प्रस्ताव आणावा, अशी आम्ही मागणी केल्याचे बेस्ट समिती सदस्य सुनील गणाचार्य यांनी सांगितले.