CSMT : एकाच प्लॅटफॉर्मवर दोन लोकल आमनेसामने, सीएसएमटी स्टेशन मास्तर निलंबित, रेल्वे प्रशासनाची कारवाई
Mumbai Local Train Disruption : सीएसएमटी स्थानकात दोन लोकल आमनेसामने आल्याच्या गंभीर घटनेनंतर मध्य रेल्वेने स्टेशन मास्तरवर निलंबनाची कारवाई केली आहे.
मुंबई : छत्रपती शिवाजी महाराज टर्मिनस (CSMT Station) येथे दोन लोकल एकाच ट्रॅकवर आमनेसामने आल्याच्या गंभीर घटनेनंतर मध्य रेल्वे प्रशासनाने मोठी कारवाई केली आहे. या प्रकरणी संबंधित स्टेशन मास्तरला निलंबित करण्यात आलं आहे. मंगळवारी दुपारी सुमारे 3 वाजण्याच्या सुमारास घडलेली ही घटना अत्यंत गंभीर मानली जात आहे. यावेळी मोठा अपघात टळल्यामुळे रेल्वे प्रशासन सतर्क झालं आहे. या प्रकारामुळे मोठा अनर्थ होऊ शकला असता, हे लक्षात घेऊन तातडीने ही कारवाई करण्यात आली.
CSMT Railway Incident : दोन लोकल आमनेसामने
बदलापूरहून येणारी फास्ट लोकल (Badlapur Fast Local) नियोजित 4 नंबर प्लॅटफॉर्मऐवजी अचानक 5 नंबर प्लॅटफॉर्मकडे वळली. मात्र त्या प्लॅटफॉर्मवर आधीच एक लोकल उभी होती. समोरच लोकल असल्याचे लक्षात येताच मोटरमनने तात्काळ ब्रेक लावले. दोन्ही गाड्यांमध्ये 120 मीटर अंतर राहिले होते. मात्र मोटरमनच्या प्रसंगावधानामुळे मोठी दुर्घटना टळली.
Railway Action : स्टेशन मास्तरवर निलंबन
या घटनेनंतर रेल्वे प्रशासनाने जबाबदारी निश्चित करत संबंधित स्टेशन मास्तरवर निलंबनाची कारवाई केली. सुरक्षेच्या दृष्टीने ही घटना अत्यंत गंभीर मानली जात आहे. रेल्वेच्या सिग्नल आणि ट्रॅक व्यवस्थापनात झालेल्या त्रुटीमुळे हा प्रकार घडल्याचा प्राथमिक अंदाज व्यक्त केला जात आहे.
Train Disruption : लोकल वाहतूक विस्कळीत
घटनेनंतर परिस्थिती नियंत्रणात आणण्यासाठी बदलापूरहून आलेली लोकल मागे घेण्यात आली. तसेच प्लॅटफॉर्मवरील दुसरी लोकल दुसऱ्या ट्रॅकवरून पुढे पाठवण्यात आली. या प्रकारामुळे सीएसएमटी स्थानकावरील 5 ते 8 क्रमांकाचे प्लॅटफॉर्म काही काळ बंद ठेवण्यात आले. या घटनेमुळे दुपारी 3.18 पासून लोकल वाहतूक विस्कळीत झाली होती.
Technical Failure : यंत्रणेत बिघाडाचा संशय
तज्ज्ञांच्या मते, अशा प्रकारची घटना सहसा घडत नाही. सिग्नल प्रणाली किंवा ट्रॅक कंट्रोल यंत्रणेत बिघाड झाल्यासच अशी परिस्थिती निर्माण होते. म्हणूनच या प्रकरणात तांत्रिक त्रुटीचा कोन तपासला जात आहे.
Series of Issues : एका दिवसात तिसरा बिघाड
महत्त्वाचं म्हणजे, बुधवारी दिवसभरात रेल्वे व्यवस्थेत हा तिसरा बिघाड ठरला आहे. पहाटे खर्डी (Khardi Station) येथे घेतलेला ब्लॉक नियोजित वेळेपेक्षा अधिक काळ चालला. त्यानंतर डोंबिवली (Dombivli Station) येथेही पूर्वसूचना न देता ब्लॉक घेण्यात आल्याने लोकल सेवा उशिराने सुरू होती.
Passenger Impact : प्रवाशांचे हाल
या सलग बिघाडांमुळे लोकल सेवा पूर्णपणे कोलमडली. प्रवाशांना प्रचंड गर्दी आणि विलंबाचा सामना करावा लागला. सीएसएमटीतील घटनेमुळे वेळापत्रक पूर्णपणे विस्कळीत झाले असून रेल्वे प्रशासनावर प्रवाशांकडून तीव्र नाराजी व्यक्त केली जात आहे.
ही बातमी वाचा:
Before You Go
Aaditya Thackeray NEET: नीट आंदोलनात गुन्हे दाखल झालेल्या ठाकरेंची मदत, केस लढण्यासाठी वकील मैदानात उतरवणार, आदित्य ठाकरेंची माहिती
महत्त्वाच्या बातम्या
