KDMC ने बिल थकवलं, ठेकेदाराने उबर्डे कचरा प्रकल्पाचं काम थांबवलं; घंटागाड्यांच्या रस्त्यावर लांबच लांब रांगा

केडीएमसीने बिल थकवले, ठेकेदाराने उबर्डे कचरा प्रकल्पाचे काम थांबवले. प्रकल्पाचे प्रवेशद्वार घंटागाड्यांसाठी बंद केल्याने कचरा गाड्यांच्या रस्त्यावर लांबच लांब रांगा लागल्या आहेत.

Kalyan Garbage Vehicles

कल्याण : कल्याण डोंबिवली महापालिकेने ठेकेदाराचे बिल थकवल्याने त्याने पालिकेच्या उबर्डे कचरा प्रकल्पाचे काम थांबवलं आहे. केडीएमसीकडे तब्बल चार कोटी रुपयांची थकबाकी आहे. त्यातच आपल्याला डिझेल क्रेडिटवर मिळत नसल्याने काम थांबवल्याची माहिती ठेकेदार कल्पेश सोनी यांनी दिली आहे. ठेकेदाराने मंगळवार (26 एप्रिल) सकाळपासून कचरा प्रक्रिया प्रकल्प बंद करत कचऱ्याच्या गाड्यांना प्रवेश बंद केला आहे. त्यामुळे भरलेल्या कचऱ्याच्या गाड्यांच्या लांबच लांब रांगा लागल्या आहेत. जोपर्यंत थकलेले बिल मिळत नाही तोपर्यंत काम सुरु करणार नसल्याची भूमिका ठेकेदाराने घेतली आहे. परिणामी शहरात कचऱ्याची भीषण समस्या निर्माण होण्याची शक्यता आहे.

कल्याण डोंबिवली शहरातील ओल्या कचऱ्यावर प्रक्रिया करण्यासाठी महापालिका प्रशासनाने उभारलेल्या उबर्डे प्लांटमध्ये कचऱ्यावर प्रक्रिया करण्यासाठी ठेकेदाराची नियुक्ती करण्यात आली आहे. या ठेकेदाराला कचऱ्यावर प्रक्रिया करण्यासाठी महापालिका प्रशासनाकडून दरमहा खर्च दिला जातो. मात्र डिसेंबर महिन्यापासून पालिका प्रशासनाकडून ठेकेदाराचे बिल देण्यात आलेले नसल्याने 4 कोटी 15 लाख रुपयांचे बिल थकले आहे. त्यातच हा प्लांट चालवण्यासाठी लागणाऱ्या डिझेलच्या किमती दिवसागणिक वाढत असताना बिल थकल्याने ठेकेदाराला डिझेल क्रेडिटवर मिळत नाही, असं ठेकेदाराचे म्हणणे आहे. 

दरम्यान वारंवार मागणी करुनही महापालिका प्रशासनाकडून केलेल्या कामाचे बिल दिले जात नसल्याने ठेकेदाराने कामबंदचे हत्यार उपसले आहे. आज सकाळपासून कचरा प्रक्रिया प्रकल्प बंद करत कचऱ्याच्या गाड्यांना प्रवेश बंद केल्याने भरलेल्या कचऱ्याच्या गाड्यांच्या लांबच लांब रांगा लागल्या आहेत. जोपर्यंत थकलेले बिल मिळत नाही तोपर्यंत काम सुरु करणार नाही, अशी ठाम भूमिका ठेकेदाराने घेतली आहे. त्यामुळे शहरात कचऱ्याची भीषण समस्या निर्माण होण्याची शक्यता आहे.

इतर बातम्या