छगन भुजबळांची प्रकृती बिघडली, जे. जे. रुग्णालयात दाखल

मुंबई : राष्ट्रवादी काँग्रेसचे ज्येष्ठ नेते छगन भुजबळ यांची प्रकृती बिघडली असल्याने त्यांना जे. जे. रुग्णालयात दाखल करण्यात आले आहे. आर्थिक गैरव्यवहारप्रकरणी भुजबळ आर्थर रोड जेलमध्ये आहेत. 15 सप्टेंबरपासून भुजबळांना प्रचंड ताप असून, त्याचं संपूर्ण अंग दुखतं आहे. मदतीशिवाय भुजबळांना दोन पावलेही चालता येत नसल्याची माहिती मिळते आहे. प्लेटलेट्स कमी झाल्या असून, ब्लडप्रेशर 104/55 इतकं आहे. प्रचंड दम लागणे, झोप न लागणे, छातीत कळ येणे असेही त्रास भुजबळांना होत आहेत. दरम्यान, जे. जे. रुग्णालयाच्या डॉक्टरांनी आर्थर रोड जेलमध्ये जाऊन भुजबळांची तपासणी केली आणि रुग्णालयात अॅडमिट करण्याचा निर्णय घेतला आहे.