भिवंडी पालिकेच्या सभागृह नेत्याची गोळ्या झाडून हत्या

भिवंडी: भिवंडी महापालिकेतील काँग्रेसचे सभागृह नेते मनोज म्हात्रे यांची अज्ञातांनी गोळ्या झाडून आणि कोयत्याने वार करुन हत्या केल्याची खळबळजनक घटना घडली आहे. बुधवारी रात्री त्यांच्यावर हल्ला करण्यात आला होता. जखमी अवस्थेतच त्यांना ठाण्यातील ज्युपिटर रुग्णालयात नेण्यात आलं. पण तिथं त्यांना डॉक्टरांनी मृत घोषित केलं. मनोज म्हात्रे हे भिवंडीतील अंजूरफाटा परिसरात राहत होते. काही कामानिमित्त ते आज त्यांच्या इमारती खाली आले होते. त्याचवेळी त्यांच्यावर जीवघेणा हल्ला करण्यात आला. या हल्ल्यानंतर हल्लेखोर फरार झाले असून सध्या पोलीस त्यांच्या शोध घेत आहेत. दरम्यान, काही दिवसांपूर्वीही मनोज म्हात्रेंवर भिवंडीमधील  नारपोली भागात हल्ला करण्यात आला होता. त्यामुळे त्यांची हत्या पूर्व वैमनस्यातून झाली असावी असा प्राथमिक अंदाज व्यक्त करण्यात येत आहे. सध्या पोलीस याप्रकरणी कसून तपास करत असून मनोज म्हात्रे यांचा कुणाशी वाद झाला होता का? याचाही चौकशी करत आहेत.