मुंबईकरांचे आणखी दोन दिवस हाल, बेस्टचा संप लांबण्याची शक्यता

मुंबईरांचे हाल होऊ नये यासाठी स्कूल बस संघटना आणि मुंबई बस मालक संघटना धावून आली आहे. जवळपास दोन हजार खासगी बसेस मुंबईकरांच्या सेवेसाठी आज रस्त्यावर धावणार आहेत.

मुंबई : बेस्ट कर्मचाऱ्यांचा संप आता आणखी दोन दिवस लांबण्याची शक्यता आहे. आज मंत्रालयात उच्च स्तरीय समितीसोबत बेस्ट कर्मचारी कृती समितीची बैठक पार पडली. या बैठकीत बेस्ट कर्मचाऱ्यांच्या मागण्यांबाबत सविस्तर चर्चा करण्यात आली.

या बैठकीदरम्यान महापालिका - बेस्ट प्रशासन आणि कर्मचारी संघटना अशा दोन्ही बाजू उच्च स्तरीय समितीने ऐकून घेतल्या. उच्च स्तरीय समितीने कर्मचारी संघटनांकडून लेखी स्वरूपात मागण्या मागवून घेतल्या आहेत. मुख्य सचिव चर्चेचा तपशील मुख्यमंत्र्यांसमोर मांडतील. त्यानंतर उच्च स्तरीय समिती अहवाल सोमवारी कोर्टासमोर सादर करणार आहे. या कोर्टात मांडलेल्या अहवालावर कोर्ट काय निर्णय देईल यावर बेस्ट संपाचं भवितव्य अवलंबून असणार आहे..

बेस्ट कर्मचारी संपाचा पाचवा दिवस

बेस्ट कर्मचाऱ्यांचा संप आज पाचव्या दिवशीही सुरुच आहे. संपाबाबत काल झालेल्या बैठकांमध्ये कोणताही तोडगा न निघाल्यानं संप सुरुच ठेवण्याचा निर्णय बेस्ट कामगार कृती समितानं घेतला. मात्र मुंबईरांचे हाल होऊ नये यासाठी स्कूल बस संघटना आणि मुंबई बस मालक संघटना धावून आली आहे. जवळपास दोन हजार खासगी बसेस मुंबईकरांच्या सेवेसाठी आज रस्त्यावर धावणार आहेत.

बेस्ट संपाच्या पार्श्वभूमीवर चार दिवसांपासून बेस्टची एकही बस रस्त्यावर उतरलेली नाही. त्यामुळे मुंबईकरांना प्रचंड गैरसोईला सामोरं जावं लागत आहे. मुंबईकरांचा त्रास कमी व्हावा यासाठी स्कूल बस संघटना आणि मुंबई बस मालक संघटना यांनी पुढाकार घेतला आहे. दोन्ही संघटना मुंबईकरांचा प्रवास सुलभ व्हावा यासाठी जवळपास दोन हजार बसेस रस्त्यावर उतरवणार आहे.

या खासगी बसमधून प्रवास करताना 10 किमीपर्यंत मुंबईकरांना 20 रुपये भाडे आकारले जाणार आहे. तर अपंग आणि जेष्ठ नागरिकांना मोफत प्रवास करता येणार आहे, अशी माहिती स्कूल बस मालक संघटनेचे मालक अनिल गर्ग यांनी दिली. तसेच बेस्टच्या बसेसवर खासगी चालक आणि वाहन नेमून बस रस्त्यावर उतरवण्याच्या तयारीत बेस्ट प्रशासन आहे.

बेस्ट संपाबाबत राज्य सरकारच्या उच्च स्तरीय समितीची आज सकाळी 11 वाजता बैठक होणार आहे. बेस्ट कर्मचाऱ्यांच्या मागण्यांवर तोडगा काढण्यासाठी तीन सदस्यीय समिती नेमण्यात आल्याची माहिती राज्य सरकारच्या वतीने मुंबई हायकोर्टात देण्यात आली.

बेस्ट कर्मचाऱ्यांच्या मागण्या - बेस्टचा 'क 'अर्थसंकल्प मुंबई पालिकेच्या 'अ 'अर्थसंकल्पात विलीन करण्याबाबत मंजूर ठरावाची त्वरित अंमलबजावणी करणे - 2007 पासून बेस्ट उपक्रमात भरती झालेल्या कर्मचाऱ्यांची 7,390 रु. सुरु होणाऱ्या मास्टर ग्रेडमध्ये पूर्वलक्षी प्रभावाने वेतन निश्चिती केली जावी - एप्रिल 16 पासून लागू होणाऱ्या नवीन वेतनकरारावर तातडीने वाटाघाटी सुरू करणे - 2016-17आणि 17-18 साठी पालिकेच्या कर्मचाऱ्यांप्रमाणे बेस्ट कर्मचाऱ्यांना बोनस - कर्मचारी सेवा निवासस्थानांचा प्रश्न निकाली काढावा - अनुकंपा भरती तातडीनं सुरु करावी

संबंधित बातम्या

संपाचा मुंबईकरांना फटका, बेस्ट भाडेवाढीचा प्रस्ताव

बेस्ट कर्मचारी संपावर चौथ्या दिवशीही तोडगा नाहीच

बेस्ट प्रशासनाचं कुठे अडलंय?

बेस्ट कर्मचाऱ्यांचा संप सुरूच राहणार, उद्धव ठाकरेंची शिष्टाई अपयशी

बेस्ट संपाविरोधात हायकोर्टात याचिका, उद्या सुनावणी

बेस्टचा संप : तिसऱ्या दिवशीही बस रस्त्यावर नाही, बत्तीही गुल होणार?

बेस्ट संप चिघळला, कर्मचाऱ्यांना मेस्माअंतर्गत नोटीस देण्यास सुरुवात

दुसऱ्या दिवशीही बेस्टचा संप सुरुच

बेस्टचा संप : टॅक्सीचालकांची मुजोरी, एसटी मुंबईकरांच्या मदतीला

मुंबईत बेस्ट कर्मचारी बेमुदत संपावर, बस वाहतूक ठप्प