MVA ans MNS Mumbai Morcha: आमची सत्ता रस्त्यावर! राज अन् उद्धव ठाकरेंची बऱ्याच वर्षांनी खांद्याला खांदा लावत 'मनसे' एकीची वज्रमूठ; निवडणूक आयोगाला गर्भित इशारा
MVA ans MNS Mumbai Morcha: महाविकास आघाडीसह मनसेकडून राजधानी मुंबईत फॅशन स्ट्रीट ते मुंबई महापालिकेचे मुख्यालय असा विराट मोर्चा काढण्यात आला.
MVA ans MNS Mumbai Morcha: मतदारयादीतील घोळ आणि मतचोरी विरोधात आज (1 नोव्हेंबर) मनसे अध्यक्ष राज ठाकरे आणि शिवसेना पक्षप्रमुख उद्धव ठाकरे पहिल्यांदाच एकत्रित रस्त्यावर उतरले. गेल्या अनेक वर्षांपासून हे चित्र महाराष्ट्राचे राजकारणामध्ये दुर्मिळ झालं होतं. मात्र, गेल्या चार महिन्यांपासून ठाकरे बंधूंमध्ये जिव्हाळा वाढल्यानंतर आज पहिल्यांदाच दोन्ही भाऊ एकत्र उतरल्याने राजकीय वर्तुळाचे सुद्धा लक्ष लागून राहिलं होतं. महाविकास आघाडीसह मनसेकडून राजधानी मुंबईत फॅशन स्ट्रीट ते मुंबई महापालिकेचे मुख्यालय असा विराट सत्याचा मोर्चा काढण्यात आला.
निवडणूक आयोगाविरोधात रस्त्यावरची लढाई
या अतिविराट मोर्चामध्ये पायी चालत उद्धव ठाकरे आणि राज ठाकरे सहभागी झाले. त्यामुळे निवडणूक आयोगाविरोधात रस्त्यावरची लढाई आता मनसेसह महाविकास आघाडीने सुरू केली आहे. जोपर्यंत मतदारयादीमधील घोळ दुरुस्त होत नाही तोपर्यंत निवडणुकाच घेऊ नका अशी एकमुखी मागणी महाविकास आघाडीसह मनसे अध्यक्ष राज ठाकरे यांनी सुद्धा घेतली आहे. एका एका घरामध्ये शेकडो मतदार दिसून आले आहेत, अनेक बोगस मतदार सुद्धा असल्याने हे बोगस मतदार कमी करावेत, दुबार नावे काढून टाकण्यात यावीत आणि मतदारयादी स्वच्छ करूनच निवडणुका घ्याव्यात अशी प्रमुख मागणी महाविकास आघाडीसह राज ठाकरे यांनी घेतली आहे. मात्र, अजूनही निवडणूक आयोगाकडून कोणताही सकारात्मक प्रतिसाद मिळालेला नाही. त्यामुळे निवडणूक आयोगाविरुद्ध मुंबई ते दिल्ली असा दबाव वाढवण्यासाठी मोर्चाची हाक देण्यात आली. या मोर्चामध्ये शिवसेना राष्ट्रवादी काँग्रेस शरद चंद्र पवार पक्षाचे अध्यक्ष शरद पवार हे सहभागी झाली.
सत्याचा मोर्चात काँग्रेसही सहभागी
दुसरीकडे, मनसे आणि शिवसेनेमधील जवळीक वाढल्याने काँग्रेसने महाविकास आघाडीत विरोध करण्यास सुरुवात केली आहे. त्यामुळे आजच्या मोर्चात प्रदेश काँग्रेसमधील नेते आणि मुंबई काँग्रेसमधील नेते सहभागी होणार की नाहीत? अशी चर्चा रंगली होती. मात्र, शेवटच्या क्षणी काँग्रेसचे नेतेही मोर्चात दिसून आले. मनसेला थेट विरोध करत असलेल्या भाई जगताप यांचाही मोर्चात सहभाग दिसून आला. बाळासाहेब थोरात, सतेज पाटील, विजय वडेट्टीवार यांच्यासह काँग्रेस नेतेही सत्याचा मोर्चात चालताना दिसून आले. राष्ट्रवादी काँग्रेसचे नेतेही मोर्चात सहभागी झाले. त्यामुळे आयोगाविरोधात दबाव वाढवण्यात महाविकास आघाडी आणि मनसेला यश आलं आहे.
इतर महत्वाच्या बातम्या
महत्त्वाच्या बातम्या
