दारू दुकानात मंदिरापेक्षा जास्त गर्दी मग मंदिरे बंद का? देवेंद्र फडणवीस यांचा ठाकरे सरकारवर निशाणा

दारू दुकानात मंदिरापेक्षा जास्त गर्दी मग मंदिरे बंद का? मंदिर उघडण्याच्या प्रश्नावरून विरोधी पक्षनेते देवेंद्र फडणवीस यांचा ठाकरे सरकारवर निशाणा.

संपादित फोटो

पंढरपूर : जेवढी गर्दी बारमध्ये होते, त्यापेक्षा कमी गर्दी मंदिरात होते. सोशल डिस्टन्स ठेवून मंदिरे उघडण्यास काय हरकत आहे, अशी सणसणीत टीका आज मंगळवारी देवेंद्र फडणवीस यांनी पंढरपूर येथे एबीपी माझा सोबत बोलताना केली. आज माजी दिवंगत आमदार सुधाकर परिचारक यांच्या प्रथम पुण्यस्मरण कार्यक्रमात ते आले होते.

आम्हा हिंदूंचे 33 कोटी देव आहेत, आम्हाला कुठेही देव भेटतो. मात्र, अनेक गरीब लोकांची उपजीविका मंदिरावर अवलंबून आहे. हारवाला ते पुजारी असंख्य गरीब लोकांची उपजीविका मंदिरावर अवलंबून आहे. त्यांच्यासाठी मंदिरं उघडा, मंदिरे बंद ठेवणे ही सरकरकची चूक आहे. तुम्ही दारूची दुकाने उघडी ठेवता. मात्र, मंदिरे बंद ठेवता म्हणत विरोधी पक्षनेते देवेंद्र फडणवीस यांनी सरकारवर निशाणा साधला. 

शाळांच्या बाबतही राज्य सरकार गोंधळलेल्या अवस्थेत असल्याचा फटका विद्यार्थी आणि पालकांना बसत आहे. शाळेबाबत धरसोड धोरण न ठेवता एक निश्चित धोरण राबविल्यास पालक आणि विद्यार्थी संभ्रमात राहणार नाहीत, असा टोला लगावला. यावेळी खासदार रणजित निंबाळकर, खासदार जयसिद्धेश्वर स्वामी, आमदार प्रशांत परिचारक, समाधान आवताडे, आमदार रणजितसिंह मोहिते पाटील, आमदार विजय देशमुख, आमदार राहुल कुल, आमदार सचिन कल्याणशेट्टी, आमदार राम सातपुते आणि आमदार गोपीचंद पडळकर उपस्थित होते.

राज्यात अनेक निर्बंधात सूट
राज्यात हॉटेल, रेस्टॉरंट, मॉल्स आणि दुकानांना रात्री 10 पर्यंत उघडी ठेवण्यास परवानगी देण्यात आली आहे. यासोबतच लग्नकार्य, खाजगी कार्यालय यांच्याही निर्बंधामध्ये सूट देण्यात आली आहे. 

सिनेमागृह, मंदिरे पुढील आदेश येईपर्यंत बंद 
सिनेमागृह आणि नाट्यगृह आणि धार्मिक स्थळे पुढील आदेश येईपर्यंत बंद असणार आहे. शॉपिंग मॉल 10 वाजेपर्यंत सुरु राहतील मात्र त्या ठिकाणी जाणारे आहेत त्यांचे दोन डोस झालेले असावेत. कार्यालयात शासकीय आणि निमशासकीय कर्मचाऱ्यांना प्रथम लसीकरण देण्याची परवानगी देण्यात आली आहे.

कोरोनाचे दोन डोस घेतलेल्यांसाठी युनिव्हर्सल पास! 

लसींचे दोन डोस घेतलेल्या नागरिकांसाठी 15 ऑगस्टपासून रेल्वे लोकल सेवा सुरू करण्याची घोषणा मुख्यमंत्री उद्धव ठाकरे यांनी रविवारी केली. त्यासाठी एक विशिष्ट यंत्रणा तयार करण्यात येणार असून, लवकरच ती सुरु करण्यात येणार आहे. पण ही यंत्रणा नक्की काम कशी करणार, याबाबत सर्वसामांन्यांच्या मनात गोंधळ आहे. त्याबाबतची माहिती जाणून घेऊया. 

लसींचे दोन्ही डोस घेतलेल्या नागरिकांना लोकल ट्रेन प्रवासासाठी विशिष्ट पास देण्यात येणार आहेत. या पासवर क्यूआर कोड असणार आहे. हा पास ‘युनिव्हर्सल पास’ म्हणून ओळखला जाईल. हा पास लोकल ट्रेनसोबतच मेट्रो, मोनोरेल त्याचप्रमाणे मॉल किंवा इतर ठिकाणी सुद्धा चालू शकणार आहे.