नागपूर : पावसाअभावी विदर्भात आणि मराठवाड्यात पाणीटंचाईची परिस्थिती उद्भवली आहे. नागपूर विभागामध्ये गेल्या वर्षी जुलैपर्यंत 22 टक्के एवढा पाणीसाठा होता. मात्र, यावर्षी केवळ 11 टक्के इतकाच पाणीसाठा झाला आहे. त्यामुळे साहजिकच विदर्भात पाणीसाठ्याअभावी यंदा शेती कशी करायची हा प्रश्न पडू लागला आहे. गेल्या काही दिवसांपासून मराठवाड्यातही पावसानं दांडी मारल्यानं बीडमध्ये शेतकऱ्यांवर दुबार पेरणीचं संकट ओढवलं आहे. खरंतर जून अखेरीस पावसाने दमदार हजेरी लावल्याने शेतकऱ्यांचा पेरणीच्या कामांना वेग आला. पावसाचा जोर पाहून शेतकऱ्यांनी मूग, उडीद, कापूस, सोयाबिन पिकांची पेरणी केली. मात्र, गेल्या काही दिवसात पावसानं सुट्टी मारल्याने उगवलेली पिकं करपू लागली आहेत. यंदा बीडमधल्या 37 तालुक्यांमध्ये सरासरीपेक्षा कमी पावसाची नोंद करण्यात आली आहे. तेव्हा पावसाअभावी शेती करायची तरी कशी असा प्रश्न बळीराजासमोर पडला आहे.

पाहा फोटो : विदर्भावर पाणीसंकट, कोणत्या प्रकल्पात किती पाणीसाठा?

नागपूरमध्ये वेणा, वैनगंगा, वर्धा, नांद, बाघ यांसारख्या नद्यांमधून मोठ्या पाटबंधारे प्रकल्पांना पाणीसाठा होतो. मात्र, केवळ 11 टक्के पाणीसाठी झाल्यानं मोठ्या पाणीटंचाईचा प्रश्न विदर्भासमोर उभा ठाकला आहे. दुष्काळानंतर गेल्या वर्षी परतीच्या पावसाने अनेक पिकांना जीवदान मिळाल होतं. तर मोठ्या प्रमाणात जलाशयात पाणीसाठा झाला होता. मात्र या वर्षी दुबार पेरणीचे ढग पुन्हा आकाशात जमा होऊ लागले आहेत त्यामुळे बळीराजा संकटात सापडला आहे.