Majha Katta : फॉक्सकॉन प्रकल्पाबाबत केवळ चर्चा, लेखी व्यवहार झालेच नाहीत, उदय सामंतांचा माझा कट्ट्यावर गौप्यस्फोट
वेदांता-फॉक्सकॉन प्रकल्पाबाबत कोणताही सामंज्यस करार झाला नव्हता. केवळ चर्चा झाली होती असे मत उद्योगमंत्री उदय सामंत ( Uday Samant) यांनी केलं.
Uday Samant on Majha Katta : वेदांता-फॉक्सकॉन (Vedanta Foxconn) प्रकल्पाबाबत कालपासून संभ्रम निर्माण केला जात आहे. या प्रकल्पाबाबत कोणताही सामंज्यस करार झाला नव्हता. केवळ चर्चा झाली होती असे मत राज्याचे उद्योगमंत्री उदय सामंत यांनी व्यक्त केलं. पॅकेज वेळेत दिलं असतं तर हे झालचं नसते असेही सामंत म्हणाले. सामंत हे आज एबीपी माझाच्या (ABP Majha) 'माझा कट्टा' (Majha Katta) या कार्यक्रमात बोलत होते. यावेळी त्यांनी सध्या विरोधक करत असललेले दावे फेटाळून लावले. दरम्यान, संलग्न प्रकल्प महाराष्ट्रात आणू अशी भूमिका मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांनी घेतल्याचेही सामंत यावेळी म्हणाले.
वेदांता-फॉक्सकॉनचा प्रकल्प महाराष्ट्रातून गुजरातला गेला आहे. यावरुन राजकीय नेते ऐकमेकांवर आरोप-प्रत्यारोप करत आहेत. मुख्यमंत्री एकनाथ शिंदेंनी त्याचं खापर महाविकास आघाडीवर फोडलं आहे. गेली दोन वर्षे कंपनीला जो प्रतिसाद मिळायला हवा होता, तो कमी पडला असावा, असं सांगत मुख्यमंत्र्यांनी आधीच्या सरकारकडे बोट दाखवलं आहे. दरम्यान, आज या सर्व प्रकल्पाबाबत माहिती देण्यासाठी उद्योगमंत्री उदय सामंत हे माझा कट्ट्यावर आले होते. यावेळी त्यांनी सविस्तर माहिती दिली.
वेदांता-फॉक्सकॉनचा प्रकल्प गुजरातला गेल्याचं मला कालच समजलं
वेदांता-फॉक्सकॉनचा प्रकल्प हा गुजरातला गेला हे मला कालच समजल्याचे उदय सामंत यावेळी म्हणाले. उच्च तंत्र शिक्षण विभाग आणि उ्दयोग विभाग ऐकमेकांशी संलग्न असणे गरजेचे असल्याचे सामंत यावेळी म्हणाले. यासंबंधी आम्ही धोरण तयार करत असल्याचे सामंत म्हणाले. येत्या काही दिवसात चांगला प्रकल्प महाराष्ट्राला मिळेल, असेही उदय सामंत यावेळी म्हणाले. दरम्यान, ड्रग्ज पार्कचा प्रकल्प महाराष्ट्रात होणार आहे. तसेच नागपूरमध्ये देखील टाटा एअरबसचा प्रकल्प होणार असल्याची माहिती सामंत यांनी दिली.
रिफायनरी प्रकल्प राज्याबाहेर जाणार नाही
रिफायनरी प्रकल्प राज्याबाहेर जाणार नसल्याची घोषणा देखील यावेळी उदय सामंत यांनी केली. रिफायनरीबाबत गैरसमज पसरवले जात असल्याचेही सामंत यावेळी म्हणाले. आमदारही रिफायनरीसाठी आग्रही आहेत. रिफायनरी प्रकल्पामुळं मोठी रोजगार निर्मिती होणार असल्याचे सामंत यावेळी म्हणाले. मोठे प्रकल्प आणायचे असल्यास राजकारण बाजूला ठेवणं गरजेचं आहे. सर्वांनी एकत्र येऊन काम करण्याची गरज असल्याचे सामंतांनी यावेळी सांगितले. राजकारण करम्यापेक्षा सांघिक अभ्यास करावा असेही सामंत यावेळी म्हणाले.
सर्व पक्षीय नेत्यांसोबत चर्चा करण्यास मी तयार
महाराष्ट्राचे उद्योग वाढणार असतील तर सर्व पक्षीय नेत्यांशी चर्चा करण्यास मी तयार आहे. पण या नेत्यांना बोलावण्याची विनंती मी मुख्यमंत्री आणि उपमुख्यमंत्र्यांना करमार असल्याचे उदय सामंत यांनी सांगितले. उद्योगमंत्री म्हणून मला जे काही करता येईल ते मी करणार आहे. उद्योग राज्यात आणण्यासाठी प्रयत्न करणार आहे. उद्योगासंदर्भात चांगली धोरण राबवण्यासाठी मी विविध ठिकाणी जाऊन माहिती घेऊल. तेथील मंत्र्यांच्या भेटी घेून चर्चा करेल अशी माहिती देखील सामंत यांनी दिली. तरुणांच्या रोजगारात कोणाही अडचणी आणू नये असेही ते म्हणाले.
फॉक्सकॉन प्रकल्पापेक्षा दुप्पट नोकऱ्या महाराष्ट्रात देणार
वेदांता-फॉक्सकॉन प्रकल्पातून जेवढ्या नोकऱ्या मिळणार होत्या, त्याच्यापेक्षा दुप्पट नोकऱ्या पुढच्या काळात महाराष्ट्रात आणण्याची जबाबदारी मी घेतो असे आश्वासन देखील यावेळी उदय सामंत यांनी दिले. याबाबत नोकरी लागल्याचा सगळा डेटा मी पुढच्या वर्षी तुमच्यासमोर ठेवेन असेही सामंत म्हणाले. दरम्यान, विरोधी पक्षनेते अजित पवार टीका करत असल्याच्या मुद्यावर देखील सामंत बोलले. अजित पवार हे विरोधी पक्ष नेते आहेत. हे जर बोलले नाहीत तर असा समज होईल की ते पण शिंदे गटात सामील झाले आहेत. मात्र, मी स्वत: अजित पवार यांनी भेटणार आहे. मी पंचायत समितीच्या सदस्यांनी बोलावले तरी मी भेटायला जाईल. आदित्य ठाकरे यांनी बोलावले तरी मी चर्चा करायला जाईल असेही सामंत यांनी यावेळी सांगितले.
महत्त्वाच्या बातम्या
