उल्हासनगर महापौरपद निवडणूक, 'साई'विरोधात शिवसेनेची याचिका

उल्हासनगर : राज्यात 21 फेब्रुवारी रोजी झालेल्या दहा महापालिकांच्या निवडणुकांपैकी उल्हासनगर महापालिकेच्या महापौरपदाची निवडणूक आज पार पडणार आहे. दुपारी दोन वाजता पालिका सभागृहात निवडणूक होणार असून यात शिवसेना आणि भाजपामध्ये कडवी झुंज होणार आहे. शिवसेनेने साई पक्षाच्या नोंदणीविरोधात थेट न्यायालयात याचिका दाखल केली असून निवडणुकीपूर्वी त्यावर सुनावणी होणार आहे, त्यामुळे या निवडणुकीत मोठी रंजकता निर्माण झाली आहे. उल्हासनगर महापालिकेच्या यंदाच्या निवडणुकीत भाजपाला टीम ओमी कलानीच्या सहाय्याने 33 जागा मिळाल्या असून बहुमताचा आकडा मात्र 39 आहे. त्यामुळे भाजपानं 11 जागा निवडून आणणारा साई पक्ष आणि दोन अपक्षांच्या साथीनं संख्याबळ 46 वर नेलं असून महापौरपदावर दावा केला आहे.

उल्हासनगर महापौर निवडीच्या तोंडावर भाजपला मोठा धक्का

भाजपने उल्हासनगरच्या महापौरपदासाठी जिल्हाध्यक्ष कुमार आयलानी यांच्या पत्नी मीना आयलानी आणि उपमहापौरपदासाठी साई पक्षाचे सर्वेसर्वा जीवन इदनानी यांना उमेदवारी दिली आहे. दुसरीकडे शिवसेनेचे या निवडणुकीत 25 नगरसेवक निवडून आले असून राष्ट्रवादीच्या चार, रिपाइंच्या दोन आणि काँग्रेसच्या एका नगरसेविकेने विकासाच्या मुद्द्यावर शिवसेनेला पाठिंबा दिला आहे. त्यामुळे शिवसेनेचं संख्याबळ 32 वर गेलं असून आणखी सात नगरसेवकांची बहुमतासाठी गरज पडणार आहे. शिवसेनेनं महापौरपदासाठी ज्योती माने आणि उपमहापौरपदासाठी रिपाइंच्या भगवान भालेराव यांचा अर्ज दाखल केला आहे. या निवडणुकीत भाजपसाठी किंगमेकर ठरलेल्या साई पक्षाने कोकण विभागीय आयुक्तांकडे आपली गटनोंदणी करताना पक्षाची घटना न लावल्यानं कोकण आयुक्तांनी साई पक्षाची आपल्याकडे महापालिकेतील पक्ष म्हणून नोंदच नसल्याचं पालिका प्रशासनाला कळवलं होतं. त्यानंतर साई पक्षाने आपली घटना सादर केली आणि कोकण आयुक्तांनी आपला निर्णय बदलला. मात्र निर्णय बदलणं गैर असल्याचा आरोप करत शिवसेनेनं उच्च न्यायालयात याचिका दाखल केली आहे. या याचिकेवर दोन वाजण्यापूर्वी सुनावणी होणं अपेक्षित असून निकाल साई पक्षाच्या विरोधात गेल्यास त्यांचे सर्व नगरसेवक अपक्ष ठरु शकतात. यानंतर फोडाफोडीचं राजकारण करुन शिवसेना आपली सात जागांची गरज सहज भागवू शकते.