Uddhav Thackeray : राम मंदिर सोहळ्याचं उद्धव ठाकरेंना निमंत्रण मिळालं, स्पीड पोस्टद्वारे आमंत्रण पत्रिका पाठवली
Uddhav Thackeray : माजी मुख्यमंत्री उद्धव ठाकरे यांना राम मंदिर सोहळ्याचं निमंत्रण देण्यात आलं असून स्पीड पोस्टद्वारे निमंत्रण पत्रिका पाठवण्यात आलीये.
मुंबई : माजी मुख्यमंत्री आणि शिवसेना उद्धव बाळसाहेब ठाकरे पक्षाचे प्रमुख उद्धव ठाकरे (Uddhav Thackeray) यांना राम मंदिर (Ram Mandir) उद्घाटन सोहळ्याचं निमंत्रण देण्यात आलं आहे. स्पीड पोस्टद्वारे हे निमंत्रण उद्धव ठाकरेंना पाठवण्यात आल्याची माहिती समरो आलीये. पण उद्धव ठाकरेंना निमंत्रण मिळालं असलं तरीही ते 22 जानेवारी रोजी नाशिकच्या काळाराम मंदिरात जाणार आहेत. त्यामुळे स्पीड पोस्टद्वारे जरी हे निमंत्रण पाठवण्यात आलं असलं तरीही या सोहळ्याला उपस्थित राहणार नसल्याचं याआधीच उद्धव ठाकरेंकडून स्पष्ट करण्यात आलंय.
अयोध्येत 22 जानेवारीला राम मंदिराचा उद्घाटन सोहळा पार पडणार आहे. या सोहळ्यासाठी देशातील प्रमुख पक्षांच्या पक्षप्रमुखांना निमंत्रित करण्यात आलंय. त्यानुसार शरद पवार, राहुल गांधी, सोनिया गांधी, मल्लिकार्जुन खरेग आणि आता उद्धव ठाकरे यांना देखील या सोहळ्याचे निमंत्रण देण्यात आलंय. पण सोनिया गांधी आणि राहुल गांधी तसेच शरद पवारही या सोहळ्यासाठी उपस्थित राहणार नाहीत.
मंदिर पूर्ण झाल्यानंतर अयोध्येत जाणार - शरद पवार
मी अयोध्येला जाणार आहे पण 22 जानेवारी नंतर आणि जेव्हा मंदिर पूर्ण होईल तेव्हा, अशी प्रतिक्रिया राष्ट्रवादीचे अध्यक्ष शरद पवार यांनी दिली. त्यामुळे शरद पवार देखील या सोहळ्याला उपस्थित राहणार नसल्याचं स्पष्ट झालं आहे. तसेच उद्धव ठाकरे हे देखील 22 जानेवारीला काळाराम मंदिरात जाऊन पूजा करणार असल्याचं सांगण्यात आलं आहे. त्यामुळे उद्धव ठाकरेही या सोहळ्याला उपस्थित राहणार नाहीत.
असा असेल उद्धव ठाकरेंचा नाशिकमधील संभाव्य दौरा
22 तारखेला आयोद्धेत राम मंदिर लोकार्पण सोहळा होत असताना नाशिकमध्ये शिवसेना ठाकरे गटाच्या अधिवेशनची आणि उद्धव ठाकरे यांच्या दौऱ्याची धूम राहणार आहे. शनिवारपासून शिवसेना ठाकरे गटाचे पदाधिकारी नाशिकमध्ये दाखल होतायत.
- उद्धव ठाकरे 22 जानेवारीला सकाळी 11 वाजता मातोश्रीहून रवाना होतील. विमानाने त्यांच्या ओझर विमानतळावर आगमन होईल.
- 1 वाजता ते ओझरहून भगूरला जाणार, स्वातंत्र्यवीर सावरकर स्मारकात जाऊन सावरकरांना अभिवादन करणार.
- 2 वाजता भगूरहून रॅडिसन ब्ल्यू हॉटेलकडे जाणार.
- सायंकाळी 5.30 वाजता काळाराम मंदिराकडे निघणार. काळाराम मंदिरात दर्शन घेऊन पूजा करणार.
- 6.30 वाजता गोदा घाटावर येऊन गोदावरीची महाआरती करणार.
- दुसऱ्या दिवशी 23 तारखेला बाळासाहेब ठाकरे जयंती निमित्ताने अभिवादन करून महाअधिवेशनाला सुरुवात होणार, 10 ते 2
- वाजेपर्यंत प्रमुख वक्ते बोलणार आहेत. उद्धव ठाकरे यांच्या भाषणाने शिबिराचा समारोप होईल.
- सायंकाळी 7 वाजता हुतात्मा अनंत कान्हेरे मैदानावर उद्धव ठाकरेंची जाहीर सभा होणार आहे. मात्र सुरुवातीला जागरण गोंधळाचा कार्यक्रम होणार आहे.
हेही वाचा :
महत्त्वाच्या बातम्या
