परिचारकांचं निलंबन करा, विधानपरिषदेत सर्वपक्षीयांची मागणी

मुंबई : विधानपरिषदेचे सदस्य प्रशांत परिचारक यांनी सैनिकांच्या पत्नींविषयी काढलेल्या अवमानकारक वक्तव्यानंतर सर्वच स्तरातून संताप व्यक्त करण्यात येत आहे. त्यातच परिचारक यांना तात्काळ निलंबित करावं, अशी मागणी भाजप वगळता सर्वपक्षीय आमदारांनी केली आहे. विधानपरिषदेचे सदस्य असलेल्या प्रशांत परिचारक यांनी सैनिकांच्या पत्नींविषयी अवमानकारक वक्तव्य केलं. यामुळे विधानपरिषद सभागृहाचाच एकप्रकारे अवमान झाला आहे. अशा सदस्यांना तात्काळ निलंबित करावं, अशी मागणी विधानपरिषदेचे विरोधी पक्षनेते धनंजय मुंडे यांनी केली आहे. शिवसेनाप्रमुख बाळासाहेब ठाकरे असते, तर या आमदाराला फासावर द्या, असं म्हणाले असते, असं सांगत शिवसेनेच्या आमदार निलम गोऱ्हे यांनी प्रशांत परिचारक यांच्यावर गुन्हा दाखल करण्याची मागणी केली. काय आहे प्रकरण: सोलापूर जिल्ह्यातील पंढरपूर तालुक्यातील भोसेमध्ये उमेदवाराच्या प्रचारार्थ आयोजित केलेल्या सभेत विरोधकांवर टीका करण्याच्या नादात भाजप पुरस्कृत आमदार प्रशांत परिचारक यांनी सीमेवर लढणाऱ्या जवानांचा घोर अपमान केला होता. "पंजाबमधील सैनिक एकदाही घरी न येता वर्षभर सीमेवर लढत असतो आणि त्याला फोन येतो तुला मुलगा झाला. त्या आनंदात तो पेढे वाटतो.” असं वादग्रस्त वक्तव्य परिचारक यांनी केलं होतं.

सैनिकांबद्दल अपशब्द काढणाऱ्या आमदाराला ठोकणार : उदयनराजे

'आमदार असू दे नाहीतर कोणी, त्याला ठोकणार म्हणजे ठोकणार' अशा भाषेत साताऱ्याचे खासदार उदयनराजे भोसले यांनीही परिचारक यांच्यावर सडकून टीका केली आहे.

संबंधित बातम्या :

आमदार प्रशांत परिचारक यांची प्रचार सभेत जीभ घसरली

'ते' वक्तव्य अनवधानानं निघालं', परिचारकांचा माफीनामा

आमदार प्रशांत परिचारकांना महिला आयोगासमोर हजर राहण्याचे आदेश