खा. उदयनराजेंवर कारवाई होणारच : गृहराज्यमंत्री दीपक केसरकर

खा. उदयनराजेंवर कारवाई होणार असल्याचं गृहराज्यमंत्री दीपक केसरकर यांनी आज स्पष्ट केलं. शिवाय उदयनराजेंच्या अटकेसाठी सातारा पोलिसांनी काल रात्री दाखवलेल्या धैर्याचं कौतुक केलं.

फाईल फोटो

कोल्हापूर : खा. उदयनराजेंवर कारवाई होणार असल्याचं गृहराज्यमंत्री दीपक केसरकर यांनी आज स्पष्ट केलं. शिवाय उदयनराजेंच्या अटकेसाठी सातारा पोलिसांनी काल रात्री दाखवलेल्या धैर्याचं कौतुक केलं. कायदा आणि सुवव्यवस्थेचा प्रश्न निर्माण होऊ नये, म्हणून पोलिसांनी रात्रीच्या वेळी कारवाई करण्याचं टाळल्याचं त्यांनी यावेळी सांगितलं. खंडणी आणि धमकावल्या प्रकरणी राष्ट्रवादी काँग्रेसचे खासदार उदयनराजे भोसले यांचा अटकपूर्व जामीन अर्ज फेटाळल्यानंतर काल (शुक्रवारी) रात्री उशीरा उदयनराजे अचानक साताऱ्यात आले. यावेळी हजारो समर्थकांच्या साथीनं त्यांनी साताऱ्याच्या रस्त्यावरुन चालत जोरदार शक्तीप्रदर्शन केलं. यावर प्रतिक्रिया देताना गृहराज्यमंत्री दीपक केसरकर म्हणाले की, "कायदा आणि सुव्यवस्थेचा प्रश्न निर्माण होऊ नये, यासाठी खा. उदयनराजेंवर पोलिसांनी रात्री कारवाई केली नाही. पण योग्यवेळी पोलीस योग्यवेळी कारवाई करतील,'' असंही त्यांनी स्पष्ट केलं. लोणंद येथील सोना अलाईज कंपनीचे मालक राजकुमार जैन यांना खंडणीसाठी धमकावल्या प्रकरणी उदयनराजे भोसलेंवर गुन्हा दाखल करण्यात आला होता. त्यांच्यासोबत तब्बल 15 जणांवर गुन्हा दाखल करण्यात आला होता. त्यापैकी 9 जणांना अटकही करण्यात आली आहे. उदयनराजे यांनी या प्रकरणी अटकपूर्व जामिनासाठी अर्ज केला होता. पण हायकोर्टानं त्यांचा जामीन अर्ज फेटाळून लावला. त्यामुळे आता उदयनराजे स्वत: पोलीस ठाण्यात हजर होणार का? हे पाहणं महत्त्वाचं ठरणार आहे. याच पार्श्वभूमीवर शुक्रवारी रात्री उदयनराजे यांनी हजारो समर्थकांसह साताऱ्यात जोरदार एंट्री केली. यावेळी मोठ्या प्रमाणात समर्थक रस्त्यावर उतरल्याचं दिसून आले. पदयात्रेदरम्यान आमदार शिवेंद्रराजे यांनी उदयनराजे भोसले यांचीही धावती भेट घेत विचारपूस केली. या भेटीने अनेकांच्या भुवया उंचावल्या असून सध्या चर्चेला उधाण आलं होतं. संबंधित बातम्या हजारो समर्थकांसह उदयनराजेंचं साताऱ्यात शक्तीप्रदर्शन उदयनराजे भोसले पोलिसांसमोर हजर होण्याची शक्यता छत्रपतींच्या घराण्याला बदनाम करण्याचे षडयंत्र : आव्हाड उदयनराजेंना अटक होण्याची शक्यता, हायकोर्टाने जामीन अर्ज फेटाळला