सोलापूर : सोलापूरचे खासदार डॉ. जयसिद्धेश्वर शिवाचार्य यांच्याविरोधात गुन्हा दाखल करण्याचे आदेश सोलापूर जिल्हा सत्र न्यायालयाने दिले आहेत. लोकसभा निवडणुकीत बोगस जात प्रमाणपत्र दाखल केल्याचा आरोप जयसिद्धेश्वर शिवाचार्य यांच्यावर आहे. जिल्हा जातपडताळणी समितीने जयसिद्धेश्वर शिवाचार्य याचं जात प्रमाणपत्र अवैध ठरवलं होतं.
न्यायलयाने CRPC 156 (3) नुसार गुन्हा दाखल करण्याचे आदेश पोलिसांना दिले आहेत. त्यानुसार सोलापुरातील सदर बाजार पोलीस ठाण्यात गुन्हा नोंदवण्यात येणार आहे. जिल्हा जात पडताळणी समितीने दाखल अवैध ठरवल्यानंतर अक्कलकोटचे तहसीलदार संतोष शिरसट यांनी न्यायालयात दाखल फिर्याद दाखल केली होती. तहसीलदारांनी नोंदवलेल्या जबाबानंतर सोलापूर जिल्हा न्यायल्याचे कारवाईचे आदेश दिले होते.
काय आहे प्रकरण?
खासदार डॉ. जयसिद्धेश्वर शिवाचार्य यांनी लोकसभा निवडणुकीत 1982 सालचा बेडा जंगम जातीचा दाखला सादर केला होता. मात्र हा दाखला बोगस असल्याची तक्रार प्रमोद गायकवाड, मिलिंद मुळे, विनायक कंडकुरे यांनी केली होती. त्यावर सोलापुर जिल्हा जात पडताळणी कार्यालयात 15 फेब्रुवारी रोजी अंतिम सुनावणी पार पडली. त्यानंतर हा निकाल राखून ठेवण्यात आला होता आणि तो निकाल 24 फेब्रुवारी रोजी करण्यात आला. डॉ. जयसिद्धेश्वर शिवाचार्य यांनी आपण सादर केलेला दाखला वैध असल्याचे सांगत सन 1344 व 1347 फसली सालातील मोडी लिपीतील नमुना पुराव्यासाठी सादर केला होता. याच्या तपासणीसाठी दक्षता समितीने तपासणी करुन आपला अहवाल सादर केला. या अहवालात खासदार डॉ. जयसिद्धेश्वर शिवाचार्य यांनी पुराव्यासाठी दाखल केलेला नमुना संशयास्पद असल्याचे स्पष्ट करण्यात आले होते.
संबंधित बातम्या
- खासदार जयसिद्धेश्वर स्वामींविरोधात हायकोर्टात याचिका, निवडणुकीत बोगस जात प्रमाणपत्र दाखल केल्याचा आरोप
- सोलापूरचे खासदार जय सिद्धेश्वर स्वामींना मुंबई हायकोर्टाकडून तूर्तास दिलासा
Jay Siddheshwar Maharaj | सोलापूरच्या खासदारांचा जातीचा दाखला हरवला, पोलिसात तक्रार दाखल! | ABP Majha