Petrol Diesel Price Today 22 May 2022 : केंद्र सरकारनं इंधनांच्या अबकारी करात कपात करण्याचा निर्णय घेतला. मध्यरात्री 12 वाजल्यापासून देशात पेट्रोल-डिझेलचे नवे दर (Petrol Diesel Price) लागू करण्यात आले. केंद्र सरकारकडून पेट्रोल-डिझेलच्या दरांत घट करण्यात आल्यानंतर देशभरात पेट्रोल (Petrol Price) आणि डिझेल (Diesel Price) स्वस्त झालं आहे. केंद्र सरकारच्या या निर्णयानंतर राज्य सरकारांनी देखील कर कमी करावेत, असं आवाहन अर्थमंत्री निर्मला सीतारमण यांनी केलं आहे. त्यामुळे आता महाराष्ट्र सरकारही इंधनावरील व्हॅट कमी करणार का? याकडं लक्ष लागलं आहे.
केंद्रानं अबकारी करात कपात केल्यानं देशात पेट्रोल साडेनऊ रुपयांनी तर डिझेल 7 रुपयांनी स्वस्त झालं आहे. त्यामुळे आधीच महागाईच्या गर्ते सापडलेल्या जनतेला काहीसा दिलासा मिळाला आहे. केंद्रापाठोपाठ केरळ आणि राजस्थाननंही पेट्रोल-डिझेलवरील व्हॅट कमी केला आहे. दरम्यान, महाराष्ट्रात इंधनावरील करामुळे पेट्रोल आणि डिझेल शेजारच्या राज्यांपेक्षा तुलनेनं महाग मिळतं. आता मोदी सरकारनं दिलासा दिल्यानंतर राज्य सरकारनंही इंधनावरील कर कमी करावा अशी मागणी केली जात आहे. त्यामुळे महाविकास आघाडी सरकार इंधनावरील कर कमी करुन राज्यातील जनतेला दिलासा देणार का? हे पाहणं महत्त्वाचं ठरणार आहे.
काँग्रेसशासित राजस्थान सरकारकडून व्हॅटमध्ये कपात
केंद्र सरकारकडून पेट्रोल डिझेलवरील अबकारी कर कमी केल्यानंतर काँग्रेसशासित राजस्थान सरकार आणि केरळ सरकारनंही व्हॅटमध्ये कपात केली आहे. पेट्रोलवरील व्हॅट 2 रुपये 48 पैसे आणि डिझेलवरील कर 1 रुपये 16 पैसे प्रति लिटरने कमी करण्याचा निर्णय राजस्थानचे मुख्यमंत्री अशोक गेहलोत यांनी घेतला आहे. त्यामुळे राजस्थानात पेट्रोल 10 रुपये 48 पैसे तर डिझेल 7 रुपये 16 पैसे स्वस्त होणार आहे. केरळनंही पेट्रोलवरील व्हॅटमध्ये 2 रुपये 41 पैसे तर डिझेलवरील व्हॅट 1 रुपया 36 पैशांनी कमी केला आहे. केंद्राच्या कालच्या घोषणेनंतर राजस्थान आणि केरळच्या नागरिकांना दुहेरी फायदा मिळणार आहे. मात्र असाच निर्णय महाराष्ट्र सरकार कधी घेणार याकडं लक्ष लागलं आहे. महाराष्ट्र सरकारही पेट्रोल, डिझेलवरील व्हॅट कमी करणार का? असा सवाल उपस्थित केला जात आहे.
जाणून घ्या देशातील महत्त्वाच्या महानगरांतील किमती
| शहरं | पेट्रोलच्या किमती (प्रति लिटर) | डिझेलच्या किमती (प्रति लिटर) |
| मुंबई | 111.35 | 97.28 |
| दिल्ली | 96.72 | 89.62 |
| चेन्नई | 102.63 | 94.24 |
| कोलकाता | 106.03 | 92.72 |
पेट्रोल आणि डिझेलचे दर (Petrol Diesel Price ) कुठे आणि कसे पाहाल?
इंडियन ऑईलचं IndianOil ONE Mobile App तुमच्या मोबाईलवर डाऊनलोड करुन तुम्ही तुमच्या जवळच्या इंडियन ऑईल पेट्रोल पंपावरील इंधनाचे दर जाणून घेऊ शकता.
इंडियन ऑईलच्या वेबसाईटवर https://iocl.com/Products/PetrolDieselPrices.aspx पेट्रोल डिझेलचे दर (Petrol Diesel Price) सोप्या पद्धतीने पाहता येतील.
पेट्रोल आणि डिझेलच्या किंमती ( Petrol Diesel Price ) एसएमएसद्वारे देखील कळू शकतात. इंडियन ऑईलच्या वेबसाईटने दिलेल्या माहितीनुसार, RSP आणि स्पेस देऊन आपल्या शहराचा कोड टाकून 92249992249 या क्रमांकावर एसएमएस करायचा आहे. हा कोड इंडियन ऑईलच्या वेबसाईटवर मिळेल. (शहरांचे कोड इंडियन ऑईलच्या वेबसाईटवर देण्यात आले आहेत).