Maharashtra Politics नागपूर : केंद्रीय मंत्री नितीन गडकरींना (Nitin Gadkari) संपूर्ण महाराष्ट्र हृदयापासून ओळखतो, त्यांच्यावर प्रेम करतो. विधानसभेत भाजपच्या विजयकरता ते आता पूर्ण ताकदीनिशी उतरतील. नितीनजींना मानणारा एक मोठा वर्ग आहे. नितीन गडकरी आमचे बडे नेते आहे. कोर ग्रुपचे प्राईम मेंबर आणि पार्लमेंटरी बोर्डचे देखील ते मेंबर आहे. परिणामी, भाजपाच्या उज्वल भविष्याकरता, महायुतीचे सरकार आणण्याकरता नितीनजी पूर्ण एक महिना देणार आहे, अशी माहिती भाजप प्रदेशाध्यक्ष चंद्रशेखर बावनकुळे (Chandrashekhar Bawankule) यांनी दिली आहे. ते नागपूर (Nagpur News) विमानतळावर आले असता ते बोलत होते.
आगामी विधानासभेच्या (Maharashtra Assembly Election 2024) अनुषंगाने भाजपचं मेगा प्लॅनिंग करण्यात आल्याची माहिती हाती आली आहे. भाजपच्या वतीने पक्षातील चार दिग्गज नेत्यांवर महत्वाची जबाबदारी सोपवण्यात आली आहे. नितीन गडकरी (Nitin Gadkari), देवेंद्र फडणवीस (Devendra Fadnavis), चंद्रशेखर बावनकुळे (Chandrashekhar Bawankule) आणि रावसाहेब दानवे (Raosaheb Danve) या चार नेत्यांवर विधानासभेसाठीची महत्त्वाची जबाबदारी असणार आहे. दरम्यान, येत्या आठवड्याभरात 20 स्टार प्रचारकांची व्यवस्थापन समिती जाहीर होणार आहे. निवडणूक व्यवस्थापन समितीचे रावसाहेब दानवे पाटील हे प्रमुख संयोजक असणार आहेत. तर अनेक भाजपचे नेते यांचा यात समावेश असणार आहे. याविषयी बोलताना चंद्रशेखर बावनकुळे यांनी ही प्रतिक्रिया दिली आहे.
आम्हाला मुख्यमंत्रीपदाची घाई नाही, उद्धव ठाकरे त्यासाठी रुसून बसले आहेत
राज्यात एकनाथ शिंदे हे मुख्यमंत्री आहे. पुढच्या काळात आमचं केंद्र नेतृत्व आणि राज्याचे तिन्ही नेते हे बसून महायुतीतील मुख्यमंत्रीपदाचा चेहरा कोण या संदर्भात निर्णय घेतील. आम्हाला मुख्यमंत्रीपदाची घाई नाही. किंबहुना महाविकास आघाडीत मुख्यमंत्रीपदासाठी उद्धव ठाकरे रुसून बसले आहेत. त्यासाठी ते दिल्लीला गेले होते. दोन दिवस काँग्रेस नेत्याच्या घरी जाऊन बसले, शरद पवारांकडे जाऊन आले. मात्र, त्यांचं नाव कोणी जाहीर करायला तयार नाही. त्यामुळे ते काल राहुल गांधीच्या सांगलीतील कार्यक्रमाला गेले नाही. याचा अर्थ काँग्रेस आणि राष्ट्रवादी मुख्यमंत्री म्हणून त्यांचा चेहरा मान्य करायला तयार नाही. लोकसभेत त्यांचा चेहरा पुढे करून सहानुभूती मिळवली. काँग्रेस आणि राष्ट्रवादी काँग्रेस शरद पवार गट, उद्धव ठाकरे यांना पुढे करायला तयार नाही. अशी घणाघाती टीकाही चंद्रशेखर बावनकुळे यांनी केली आहे.
हे ही वाचा