पालघर तालुक्यात राष्ट्रवादी काँग्रेसची मनसेसोबत हातमिळवणी! राष्ट्रवादी आमदार अनभिज्ञ

पालघर तालुक्यात राष्ट्रवादी काँग्रेसची मनसेसोबत हातमिळवणी केली आहे. मात्र, राष्ट्रवादी काँग्रेसचे जिल्हाध्यक्ष तथा खुद्द आमदार या गोष्टीपासून अनभिज्ञ असल्याचे समोर आले आहे.

मनसेचा बॅनर

पालघर : जिल्ह्यातील जिल्हा परिषद आणि पंचायत समितीच्या पोटनिवडणुकी मधील प्रचारात रंगत वाढू लागली आहे. सर्वच पक्ष स्वबळावर निवडणुकीत उतरले असले तरी काही जागांवर छुप्या आघाड्या केल्या जात आहेत. वाडा तालुक्यात मनसे भाजप सोबत गेली असताना, पालघर तालुक्यात मात्र मनसेने राष्ट्रवादी सोबत घरोबा केला आहे. पालघर तालुक्यात पंचायत समितीची जिंकलेली एक जागा कायम राखण्यासाठी राष्ट्रवादीसोबत हातमिळवणी केली आहे. राज्यात राष्ट्रवादी काँग्रेसवर टीका करणारी मनसे राष्ट्रवादी काँग्रेससोबत गेल्याने आश्चर्य व्यक्त केले जात आहे. दरम्यान राष्ट्रवादी काँग्रेसचे जिल्हाध्यक्ष तसेच आमदार सुनील भुसारा मनसे सोबत केलेल्या आघाडी बाबत अनभिज्ञ आहेत. त्यामुळे आमदारांनाच आपला पक्ष गोपनीय गोष्टींपासून दूर ठेवत आहे की काय अशा चर्चेला उधाण आले आहे.

वर्षभरापूर्वी पंचायत समितीच्या सार्वत्रिक निवडणुकीत माण पंचायत समिती गणात मनसेचे योगेश पाटील निवडून आले होते. पालघर तालुक्यातून मनसेचा एकमेव उमेदवार निवडून आल्याने मनसेमध्ये उत्साहाचे वातावरण होते. परंतु, सर्वोच्च न्यायालयाच्या निर्णयामुळे माण पंचायत समिती गणातील सदस्य पद रद्द झाले होते. त्यानंतर पडलेल्या आरक्षणात माण पंचायत समिती गण सर्वसाधारण महिला प्रवर्गासाठी राखीव झाला आहे.

मनसेने जिंकलेली एक जागा कायम राखण्यासाठी उमेदवाराने कंबर कसली आहे. त्यासाठी विरोधात राष्ट्रवादी काँग्रेस सोबत घरोबा केला आहे. दोन्ही पक्षांच्या स्थानिक नेत्यांनी आपसात संगनमत करून एकमेकांना मदत करण्याचे ठरवले आहे. माण पंचायत समिती गणात मनसेने राष्ट्रवादी काँग्रेसची सोबत केली आहे. त्याबदल्यात धुकटन पंचायत समिती गणात राष्ट्रवादी काँग्रेसच्या उमेदवाराला मनसेने पाठिंबा दिला आहे.

मनसेच्या बॅनरवर राष्ट्रवादी काँग्रेसचे अध्यक्ष शरद पवार यांचा फोटो 
पालघर तालुक्यात मनसे उमेदवाराच्या बॅनरवर राष्ट्रवादी काँग्रेसचे अध्यक्ष शरद पवार यांचा फोटो झळकल्याने आश्चर्य व्यक्त केले जात आहे. राष्ट्रवादी काँग्रेसच्या बॅनर वर मनसेचे जिल्हाध्यक्ष अविनाश जाधव यांचा फोटोला स्थान देण्यात आले आहे. राज्य स्तरावर मनसेचे नेते राष्ट्रवादी काँग्रेसवर टीका करीत असताना पालघर तालुक्यात मनसे राष्ट्रवादी काँग्रेस एकत्र आल्याची चर्चा पालघर तालुक्यात जोर धरत आहे. वाडा तालुक्यात भाजप सोबत आणि पालघर मध्ये राष्ट्रवादी काँग्रेस सोबत घरोबा करणाऱ्या मनसे बाबत प्रश्न उपस्थित केला जात आहे. विशेष म्हणजे या सर्व घडामोडी बाबत आमदार सुनिल भुसारा हे अनभिज्ञ असल्यामुळे विविध विषयांना फाटे फुटताना दिसत आहे.

मनसे सोबत केलेल्या हातमिळवणी बाबत मला माहिती नाही : राष्ट्रवादी आमदार सुनील भुसारा 
मोखाडा तालुक्यात राष्ट्रवादी काँग्रेस शिवसेनेचे सोबत आघाडी करून निवडणूक लढवत आहे. इतर तालुक्यात स्वतंत्रपणे निवडणूक लढवली जात आहे. पालघर तालुक्यात मनसे सोबत केलेल्या हातमिळवणी बाबत मला माहिती नाही. परंतु माहिती घेतो, अशी प्रतिक्रिया राष्ट्रवादीचे आमदार तथा जिल्हाध्यक्ष सुनील भुसारा यांनी दिलीय.