नरेंद्र पाटलांचे साताऱ्यातून उदयनराजेंविरोधात निवडणूक लढण्याचे संकेत, शिवेंद्रराजेंचीही साथ?

राष्ट्रवादी काँग्रेस पक्षाच्या आणि साताऱ्याचे खासदार उदयनराजे भोसले यांच्या गोटात अस्वस्थता पसरवणारी घटना आज साताऱ्यात घडली आहे.

सातारा : राष्ट्रवादी काँग्रेस पक्षाच्या आणि साताऱ्याचे खासदार उदयनराजे भोसले यांच्या गोटात अस्वस्थता पसरवणारी घटना आज साताऱ्यात घडली आहे. माथाडी कामागारांचे नेते नरेंद्र पाटील भाजपच्या तिकिटावर साताऱ्यातून उदयनराजे भोसले यांच्याविरोधात निवडणूक लढणार असल्याची चर्चा आहे. त्यात आज नरेंद्र पाटील यांनी राजकीय विरोधक असलेले उदयनराजेंचे चुलत बंधू शिवेंद्रराजे भोसले यांची भेट घेतली आहे. या भेटीने साताऱ्यासह राज्यात विविध चर्चांना उधाण आले आहे. नरेंद्र पाटील हे पूर्वी राष्ट्रवादी काँग्रेस पक्षात होते. परंतु सध्या ते भाजपमध्ये आहेत. आज पाटील यांनी साताऱ्यातून लोकसभा निवडणूक लढण्याचे संकेत दिले आहेत. त्यात नरेंद्र पाटलांनी उदयनराजे भोसले यांचे राजकीय विरोधक असलेल्या शिवेंद्रराजे भोसले यांची भेट घेतली. एका हॉटेलमध्ये मिसळ खाण्यासाठी हे दोघे भेटले असल्याचे पाटलांनी सांगितले. हॉटेलमध्ये पाटील आणि भोसले या दोघांमध्ये बराच वेळ राजकीय विषयांवर बातचीत झाली. या दोघांच्या भेटीने राष्ट्रवादीच्या गोटात मात्र शांतता पसरली आहे. आज नरेंद्र पाटलांनी एबीपी माझाशी बातचीत केली. यावेळी पाटील यांनी साताऱ्यात उदयनराजेंविरोधात लोकसभा निवडणूक लढवण्याचे संकेत दिले. गेल्या 10 वर्षात साताऱ्याचा विकास रखडला असल्याची खंत पाटलांनी यावेळी व्यक्त केली. मतदारांनी संधी दिल्यास भाजप साताऱ्याचा विकास नक्की करेल, असा विश्वास पाटलांनी यावेळी व्यक्त केला.