Uddhav Thackeray : नैतिकदृष्ट्या मुख्यमंत्र्यांनी राजीनामा द्यावा, ईडीच्या कारवाईनंतर नितेश राणेंचा उद्धव ठाकरेंना सल्ला

मुख्यमंत्री उद्धव ठाकरे यांच्या पत्नी रश्मी ठाकरे यांचे भाऊ असलेल्या श्रीधर पाटणकर यांच्यावर ईडीने केलेल्या कारवाईनंतर आमदार नितेश राणेंनी ठाकरे सरकावर टीकास्त्र सोडले आहे.

File Photo Nitesh Rane

Nitesh Rane slams Uddhav Thackery : अंमलबजावणी संचालनालय अर्थात ई़डीने (ED) मुख्यमंत्री उद्धव ठाकरे यांचे मेव्हणे श्रीधर पाटणकर यांच्या संपत्तीवर कारवाई केली आहे. पुष्पक बुलियन या कंपनीशी संबंधित एका प्रकरणी ही कारवाई करण्यात आली असून यानंतर आता विविध स्तरातून प्रतिक्रिया येत आहेत. भाजप आमदार नितेश राणे यांनी थेट उद्धव ठाकरे यांच्या राजीनाम्याची मागणी केली आहे.

मुख्यमंत्री उद्धव ठाकरे यांच्या पत्नी रश्मी ठाकरे यांचे भाऊ श्रीधर पाटणकर हे आहेत. दरम्यान ईडीने जप्त केलेल्या मालमत्तेमध्ये नीलांबरी प्रोजेक्ट्समधील 11 सदनिकांचा समावेश आहे. या सदनिका साईबाबा गृहनिर्मिती कंपनीच्या नावावर आहेत. साईबाबा गृहनिर्मिती ही कंपनी श्रीधर माधव पाटणकर यांच्या मालकीची असल्याने ही कारवाई थेट ठाकरे सरकारशी संबधित असल्यानं नितेश राणे यांनी मुख्यमंत्र्यांनी याबाबत उत्तर द्यावं आणि नैतिकदृष्ट्या राजीनामा द्यावा असंही त्यांनी म्हटलं आहे. 

नैतिकतेच्या व्याख्या शोधाव्या लागतील : संजय राऊत

नितेश राणे यांच्या या प्रतिक्रियेवर शिवसेना खासदार संजय राऊत यांनीही पलटवार केला आहे. राणे यांनी मुख्यमंत्र्यांनी नैतिकदृष्ट्या राजीनामा द्यावा असं म्हटल्यावर असं असेल तर नैतिकतेच्या व्याख्या शोधाव्या लागतील असा पलटवार राऊत यांनी केला आहे.

काय आहे ईडीची कारवाई?

ईडीने आज प्रसिद्धीपत्रक काढून या कारवाईची माहिती दिलीय. 6 मार्च 2017 मध्ये नोंदवलेल्या मनी लाँडरिंग प्रकरणी ही कारवाई असल्याचंही स्पष्ट करण्यात आलंय. 2017 मध्ये मेसर्स पुष्पक बुलियन्स या पुष्पक ग्रुपच्या एका कंपनीविरोधात ही कारवाई होती. मात्र आज झालेली जप्तीची कारवाई ही उद्धव ठाकरे यांच्या मेव्हण्याच्या म्हणजेच श्रीधर माधव पाटणकर यांच्या मालकीच्या श्री साईबाबा गृहनिर्मिती प्रा. लि. च्या रहिवासी सदनिका आहेत. या सदनिका ठाण्यातील निलांबरी गृहप्रकल्पातील आहेत. महेश आणि चंद्रकांत पटेल यांच्या मालकीच्या पुष्पक ग्रुपमधील पुष्पक बुलियन्सच्या मनी लाँडरिंगबाबत ही कारवाई आहे. या प्रकरणी तब्बल 21.46 कोटी रुपयांची मालमत्ता यापूर्वीच जप्त करण्यात आली आहे. नंदकिशोर चतुर्वेदी आणि महेश पटेल यांनी संगनमताने पुष्पक रिएलिटी या पुष्पक ग्रुपमधील कंपनीमधील तब्बल 20 कोटी रुपयांची रक्कम नंदकिशोर चतुर्वेदी यांच्यामार्फत वेगवेगळ्या बोगस कंपन्यांमध्ये गुंतवले. नंदकिशोर चतुर्वेदी यांच्या मालकीच्या हमसफर डीलर प्रा. लि. या केवळ कागदोपत्री असलेल्या कंपनीमार्फत श्रीधर पाटणकर यांच्या श्री साईबाबा गृहनिर्मिती या कंपनीला 30 कोटी रुपये बिगर तारण कर्ज दिल्याचं दाखवलं. पुष्पक ग्रुपच्या महेश पटेल यांनी नंदकिशोर चतुर्वेदी यांच्या मदतीने साईबाबा गृहनिर्मिती प्रकल्पात अवैध रक्कम गुंतवल्याचा आरोप ईडीच्या प्रसिद्धीपत्रकात करण्यात आला आहे.

हे ही वाचा

LIVE TV | मराठी बातम्या, ब्रेकिंग न्यूज, महाराष्ट्रासह देश-विदेशातील प्रत्येक घडामोडी पाहा लाईव्ह - ABP Majha

[yt]

[/yt]