Bhagwat Karad : राज्याचे केंद्राकडे नाही तर केंद्राचेच राज्य सरकारकडे पैसे बाकी : भागवत कराड

राज्याचे केंद्राकडे नाही तर केंद्राचेच राज्य सरकारकडे पैसे बाकी असल्याचे वक्तव्य केंद्रीय अर्थराज्यमंत्री डॉ भागवत कराड यांनी केलं आहे.

Bhagwat Karad

Bhagwat Karad : मुख्यमंत्री उद्धव ठाकरे हे केंद्राकडे बोट दाखवून आमचे एवढे पैसे शिल्लक आहेत, तेवढे पैसे शिल्लक आहेत असं सांगत फिरतात. पण राज्याचे केंद्राकडे नाही तर केंद्राचेच राज्य सरकारकडे पैसे बाकी असल्याचे वक्तव्य केंद्रीय अर्थराज्यमंत्री डॉ भागवत कराड यांनी केलं आहे. महाविकास आघाडी सरकारनेच राज्यात महागाई वाढवली असल्याचेही भागवत कराड म्हणाले. परभणीत जेष्ठ शेतकरी शेषराव भरोसे यांच्या स्मृतीप्रित्यर्थ राज्यस्तरीय कृषी संजीवनी महोत्सवाचे आयोजन करण्यात आलं आहे. त्याचं उदघाटन भागवत कराड यांच्या हस्ते करण्यात आलं, त्यावेळी ते बोलत होते.

महाराष्ट्रासारख्या देशाच्या विकासात सर्वात मोठे योगदान देणाऱ्या राज्याला आर्थिक बाबतीत सापत्न वागणूक दिली जात असल्याचे वक्तव्य मुख्यमंत्री उद्धव ठाकरे यांनी केलं होतं. त्यांच्या या टिकेनंतर भाग भागवत कराड यांनी राज्य सरकारवरच टीका केली आहे. केंद्राचेच राज्य सरकारकडे पैसे बाकी असल्याचे कराड यांनी म्हटले आहे. तसेच आपल्या भाषणात भागवत कराड यांनी महागाईवरुन थेट मुख्यमंत्री उद्धव ठाकरे यांच्यावरच निशाणा साधला. भाजपचे तर आमदार बबनराव लोणीकर यांनी देखील महाविकास आघाडी सरकारवर टीका केली. हे महाविकास आघाडीचे सरकार हे बिघाडी असून, सर्व योजना बंद करण्याचे काम केले जात असल्याचा आरोप लोणीकर यांनी केला. दरम्यान, शेतकऱ्यांना 50 हजार कोटी रुपये देणार स्वातंत्र्याच्या इतिहासातील फडणवीस सरकार हे एकमेव सरकार असल्याचेही बबनराव लोणीकर यावेळी म्हणाले.

नेमकं काय म्हणाले होते मुख्यमंत्री

पंतप्रधान नरेंद्र मोदी यांनी कोरोनाच्या संदर्भातील आढावा घेण्यासाठी काही राज्यांच्या मुख्यमंत्र्यांसोबत ऑनलाईन बैठक घेतली होती. या बैठकीत पेट्रोल आणि डिझेलवरील कराचा मुद्दा उपस्थित करुन त्यांनी राज्य सरकारमुळे पेट्रोल व डिझेलचे दर चढेच राहिले आहेत, असा आरोप केला होता. पंतप्रधान मोदींच्या आरोपांना मुख्यमंत्री उद्धव ठाकरे यांनी सडेतोड प्रत्युत्तर दिले होते. देशाच्या विकासात सर्वात मोठे योगदान देणाऱ्या महाराष्ट्रासारख्या राज्याला आर्थिक बाबतीत सापत्न वागणूक दिली जात असल्याचा आक्षेप मुख्यमंत्र्यांनी घेतला होता. असल्याचंही मुख्यमंत्री म्हणाले. तसेच संपूर्ण देशात सर्वात जास्त म्हणजे 15 टक्के जीएसटी महाराष्ट्रातून गोळा होतो. असे असूनही राज्याला सुमारे 26 हजार 500 कोटी रुपये जीएसटी थकबाकीपोटी मिळणे बाकी असल्याचे ठाकरे म्हणाले होते.