'सरकारला फक्त टक्केवारी गोळा करण्यात रस', MHADAची परीक्षा पुढे ढकलल्यानंतर टीकेची झोड
MHADA Exam Update : म्हाडाची आज रविवारी होणारी परीक्षा व त्यानंतर होणारी परीक्षा पुढे ढकलली आहे.परीक्षा रद्द झाल्यानंतर विरोधी पक्ष आणि विद्यार्थ्यांकडून महाविकास आघाडी सरकारवर टीकेची झोड उठवली आहे.
सरकारला फक्त आणि फक्त टक्केवारी गोळा करण्यात रस
भाजप आमदार गोपीचंद पडळकर यांनी म्हटलं आहे की, प्रस्थापितांचे बोलघेवडे जितेंद्र आव्हाड गृह निर्माण खात्याचा दर आठवडायाला एक्सेल शीट मध्ये न चुकता हिशोब घेतात. पण बहुजन पोरांच्या भविष्याशी निगडीत असलेल्या म्हाडा नोकरी बाबत लक्ष देण्यासाठी त्यांना वेळ नाही. ते स्वतःच मागील आठवड्याभरापासून म्हाडाचे नोकर भरती परीक्षामध्ये घोटाळे होणार आहेत, त्यात बळी पडू नये म्हणून प्रसारमाध्यमातून आवाहन करत होते. जर त्यांना घोटाळ्याची पूर्व कल्पना होती आणि गृहखातेही राष्ट्रवादीकडे असतानासुद्धा त्यांना मध्यरात्री दीड वाजता परीक्षा रद्द का करावी लागली. यावरून सिद्ध होते की प्रस्थापितांच्या सरकारला फक्त आणि फक्त टक्केवारी गोळा करण्यात रस आहे. एक एक पै गोळा करून परीक्षेसाठी पोहचलेल्या बहुजन पोरांविषयी, नोकरी अभावी आत्महत्या करणाऱ्या बहुजन पोरांविषयी त्यांना काहीही देणंघेणं नाही, असं पडळकर यांनी म्हटलं आहे.
आज लाखो विद्यार्थी म्हाडाची परीक्षा देण्यासाठी शेकडो किलोमीटर लांब असणाऱ्या परीक्षा ठिकाणी एसटी,रेल्वेने पोहोचले. हजारो विद्यार्थी एसटी स्टॅन्ड वर, रेल्वे स्टेशन वर झोपले पण पहाटे परीक्षा रद्द करण्याची घोषणा मंत्री जितेंद्र आव्हाड यांनी केली . आज मंत्री जितेंद्र आव्हाड यांनी राष्ट्रवादीचे अध्यक्ष माननीयपवार साहेबांना अनोख्या शुभेच्छा दिल्या वाटतं, असं आमदार राम सातपुतेंनी म्हटलं आहे.
पैसे खर्च झाले याची भरपाई कोण देणार
रात्री अचानक सांगण्यात आलं म्हाडाची परीक्षा रद्द करण्यात आली आहे. राज्यभरातून आज अनेक विद्यार्थी ठीक ठिकाणी परिक्षेसाठी गेले आणि तिथं गेल्यानंतर त्यांना कळलं परीक्षा रद्द करण्यात आली. आज अनेक विद्यार्थी खाजगी वाहतूकीचा वापर करून परिक्षेसाठी पोहोचले त्यांचे जादाचे पैसे देखील खर्च झाले याची भरपाई कोण देणार. दुसरीकडे अनेकवेळा पेपर फुटत आहेत आम्ही मागणी केली ही परीक्षा घेण्याचे आदेश एमपीएससीला द्या परंतु पैसे मिळवण्यासाठी जाणीवपूर्वक खाजगी कंपनीला जी ब्लॅक लिस्ट आहे तिला कॉन्ट्रॅक्ट हे देत आहेत. मोठ्या प्रमाणात भ्रष्टाचार आहे, असं एमपीएससी समन्वय समिती सदस्य निलेश निंबाळकर यांनी म्हटलं आहे.
म्हाडा च्या पूर्ण आठवड्यात होणाऱ्या परीक्षा पुढे ढकलण्यात आली आहे
— Dr.Jitendra Awhad (@Awhadspeaks) December 11, 2021
उद्या परीक्षा होणार नाही pic.twitter.com/ewR8XrWe0G
आव्हाड यांच्या या ट्विटनंतर त्यावर विद्यार्थ्यांच्या संतप्त प्रतिक्रिया येत आहेत. बंद असताना विद्यार्थी आधीच शेकडो रुपये खर्चून नियोजन करून बसले होते. सरकारने प्रत्येक परीक्षार्थीच्या खात्यात नुकसानभरपाई म्हणून 2000 रु. जमा करावेत, असं एका विद्यार्थ्यानं म्हटलं आहे. आरोग्य विभागमध्ये पण तेच म्हाडामध्ये पण तेच. सरकारचा नियोजन शून्य कारभार आहे, असं एका विद्यार्थ्यानं म्हटलं आहे.
आज म्हाडा साठी सकाळच्या सत्रात कार्यकारी अभियंता, उप अभियंता, सहायक अभियंता आणि सहायक विधी सल्लागार तर दुपारच्या सत्रात कनिष्ठ अभियंता पदाची होणारी परीक्षा पुढे ढकलण्यात आल्याची माहिती गृहनिर्माण मंत्री जितेंद्र आव्हाड यांनी परीक्षेच्या आदल्या दिवशी मध्यरात्री ट्विट करून दिली आहे. ही परीक्षा जानेवारी महिन्यात होईल असं देखील जितेंद्र आव्हाड यांनी म्हटलं आहे. या परीक्षेसाठी आज सकाळच्या सत्रात 50 हजार उमेदवार तर दुपारच्या सत्रात 56 हजार उमेदवार परीक्षा देणार होते.
काही दिवसांपूर्वी या परीक्षेमध्ये मोठ्या प्रमाणात उमेदवारांकडून पैसे घेण्यात येत असल्याच्या तक्रारी गृहनिर्माण मंत्री जितेंद्र आव्हाड यांच्याकडे आल्या होत्या. त्यानुसार त्यांनी ही दलाली पद्धत मोडीत काढण्यासाठी जी पदं भरायची आहेत. त्या परीक्षेची प्राथमिक परीक्षा आणि त्यातून गुणवत्ता यादीत आलेल्या मुलांची मुख्य परीक्षा होईल असं जाहीर केलं होतं. यासोबतच त्या दलालांना उमेदवारांचे पैसे परत करा असा इशारा देखील दिला होता. आज ही परीक्षा होणं अपेक्षित होतं परंतु मध्यरात्री जितेंद्र आव्हाड यांनी काही तांत्रिक कारणास्तव आपण ही परीक्षा पुढे ढकलत असल्याचं म्हटलं आहे.
Before You Go
Vande Mataram Special Report : वंदे मातारमबाबत काँग्रेसचा ठराव, अमित शाहांचा हल्लाबोल
महत्त्वाच्या बातम्या
