युट्यूबवरील व्हिडीओ पाहून बनावट नोटा बनवणारा अटकेत

युट्यूबवरील व्हिडीओ पाहून बनावट नोटा बनवणाऱ्या आरोपीला पुणे पोलिसांनी अटक केली आहे. सोहेल सलीम शेख असे आरोपीचे नाव असून पोलिसांनी त्याच्या ऑफीसवर छापा घालून त्याला अटक केली आहे.

पुणे : युट्यूबवरील व्हिडीओ पाहून बनावट नोटा बनवणाऱ्या आरोपीला पुणे पोलिसांनी अटक केली आहे. सोहेल सलीम शेख असे आरोपीचे नाव असून तो बनावट नोटा बनवत असल्याची माहिती पोलिसांना मिळाली होती. पोलिसांनी त्याच्या ऑफीसवर छापा घालून त्याला अटक केली आहे. सोहेल देहूरोड येथे तो बनावट नोटा तयार करत असल्याची माहिती पोलिसांना मिळाली होती. सोहेलकडे एकाच नंबरच्या 200 रुपयांच्या सात नोटा सापडल्या आहेत. त्याच्याकडे पोलिसांनी चौकशी केली असता त्याने पोलिसांना सांगितले की, युट्यूबवरील व्हिडीओ पाहून तो बनावट नोटा बनवण्यास शिकला. युट्यूबवरचा व्हिडीओ पाहून सोहेलने प्रिंटर विकत घेतला. व्हिडीओमध्ये सांगितल्याप्रमाणे त्याने दोनशे रुपयाच्या नोटा स्कॅन करून त्या पंधरा दिवसापासून बनवत होता. त्या नोटा छोटी - छोटी दुकाने चालवणाऱ्या वृद्ध महिलांना देऊन तो त्यांच्याकडून चॉकलेट, बिस्कीट, सिगारेट, किराणा साहित्य खरेदी करत असल्याचे त्याने पोलिसांना सांगितले. पोलिसांनी सोहेलकडून बनावट नोटा बनवण्यासाठी वापरलेले प्रिंटर, कागद, ब्लेड, कटर हे सगळे साहित्य जप्त केले आहे. सोहेलविरोधात समर्थ पोलीस ठाण्यात गुन्हा दाखल करण्यात आला आहे. त्याला 24 जानेवारीपर्यंत कोर्टाने पोलीस कोठडी सुनावली आहे. सोहेलने अजून अशा प्रकारच्या नोटा कुठे दिल्या आहेत का? वापरल्या आहेत का? पोलीस याचा तपास करत आहेत.