Maharashtra Political Crisis : महाराष्ट्राच्या राजकारणात शिवसेनेतील बंडाळीने उफाळलेला वाद पहाता सर्वसामान्य शिवसैनिक व्यथित झाला आहे. शिवसेनेचे धुळ्यातील उपमहानगरप्रमुख निष्ठावान शिवसैनिकाने शहरातील झाशी राणी चौकात मोठे बॅनर लावून आपल्या भावना व्यक्त केल्या आहेत. साहेब, यंदा पण पांडुरंगांची आरती तुमच्याच हातुन होणार. असे जाहीरपणे म्हणत मुख्यमंत्री शिवसेना पक्ष प्रमुख उध्दव ठाकरे हेच भविष्यातही कायम रहातील, असा विश्वास व्यक्त केला आहे. विशेष म्हणजे हे बॅनर सर्व धुळेकरांचे लक्ष वेधून घेत आहे.
शिवसैनिकांचा ठाम विश्वास, सेनेच्या कार्यकर्त्यांनी लावलेले बॅनर चर्चेत
शिवसेनेतील बंडाळीमुळे राज्यातील महाविकास आघाडीचे सरकार अस्थिर झाले असले तरी सरकारला धोका नाही, असा ठाम विश्वास निष्ठावान शिवसैनिकांचा आहे. दरवर्षी आषाढी एकादशिला मुख्यमंत्र्यांच्या हस्ते पूजा केली जाते. त्यामुळे यंदाही विठुरायाची आरती ही शिवसेनेचे मुख्यमंत्री उध्दव ठाकरे यांच्याच हस्ते होईल. याची खात्री असल्यानेच शिवसेनेचे उपमहानगर प्रमुख असलेले प्रविण साळवे यांनी हे जाहीरपणे मांडत हे बॅनर झळकवले आहे. विठुरायाचा आशीर्वादरूपी हात आपल्या पाठीशी असल्याचा जेवढा विश्वास उध्दव ठाकरे यांना आहे, तितकाच किंबहुना त्याहून अधिक विश्वास धुळे शिवसेना उपमहानगरप्रमुख असलेल्या प्रविण साळवे यांना आहे. त्यामुळेच त्यांनी लावलेल्या या पोस्टरची संपूर्ण धुळे शहरात चर्चा होत आहे.
एकनाथ शिंदे, बंडखोर शिवसेना आमदारांचा निषेध
दरम्यान, शिवसेना उपमहानगर प्रमुख प्रविण साळवे यांनी या पोस्टर जवळ येवून बंडखोर झालेल्या शिवसेना आमदारांचा निषेध केला. यावेळी उध्दव साहेब आगे बढो, हम तुम्हारे साथ है. असे म्हणतांनाच पक्षात फितुरी करणाऱ्या मंत्री एकनाथ शिंदे यांचा तीव्र शब्दात धिक्कार केला. शिवसेना ही फिनिक्स पक्षासारखी राखेतुन पुन्हा उभी रहाणारी संघटना आहे. एका दुसऱ्याच्या जाण्याने या संघटनेत काहीही फरक पडत नाही. मात्र सच्चा शिवसैनिक गद्दारांना कधी माफ करीत नाही, असे त्यांनी प्रसार माध्यमांशी बोलतांना सांगितले.
इतर महत्वाच्या बातम्या